Սուպերմարկետի տեսախցիկները ֆիքսել են՝ ինչպես է երիտասարդը հաճախորդի iPhone X-ը գողանում (տեսանյութ)
Իրավապահները որոնում են սուպերմարկետում քաղաքացու բջջային հեռախոսը հափշտակած անձին:
Քննչական կոմիտեից հայտնում են, որ մայիսի 24-ին հաղորդում է ստացվել, որ նույն օրը ժամը 13:10-ի սահմաններում ենթադրյալ հանցագործություն կատարած անձը Երևանում գործող սուպերմարկետներից մեկում քաղաքացու պայուսակից հափշտակել է «Այֆոն x» տեսակի բջջային հեռախոսը:
Դեպքի առթիվ հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 2-րդ կետի հատկանիշներով:
Նախաքննության ընթացքում ստացվել են դեպքի վայրում տեղակայված անվտանգության տեսախցիկների տեսագրությունները, ենթարկվել զննության: Տեսանյութի մեջ երևում է, թե ինչպես է մի երիտասարդ կնոջ պայուսակից ինչ-որ իր հանում և վազելով հեռանում:
Քրեական գործով բազմակողմանի, օբյեկտիվ և լրիվ քննությունն ապահովելու նպատակով միջոցներ են ձեռնարկվում՝ տեսանյութում պատկերված անձին հայտնաբերելու ուղղությամբ։
Խնդրում ենք նշված անձին ներկայանալ վարույթն իրականացնող մարմնին կամ ովքեր ճանաչում են նրան, որևէ տեղեկություն ունեն նրա ինքնության կամ գտնվելու վայրի կամ, ընդհանրապես, դեպքի մասին, հայտնեն ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին: