Նիկոլ Փաշինյանը հրաժարվում է Բաղրամյան 26-ի նստավայրից
Կառավարությունը հունիսի 28-ին ընդունեց «Վարչապետի աշխատակազմի տեղակայման վայրը սահմանելու մասին» նախագիծը: Այն օրակարգի չզեկուցվող հարցերից է: Կառավարության որոշմամբ՝ վարչապետի աշխատակազմի տեղակայման վայր է սահմանվում Մարշալ Բաղրամյան պողոտա 26-ը և Հանրապետության հրապարակ, Կառավարական տուն 1-ը:
Հիմնավորման մեջ նշված է, որ նախագիծը մշակելիս ուսումնասիրվել և հաշվի է առնվել «Վարչապետի աշխատակազմի կանոնադրությունը և կառուցվածքը հաստատելու մասին» վարչապետի որոշումը, որի 7-րդ կետում նշված է, որ աշխատակազմի գտնվելու վայրն է Հայաստանի Հանրապետություն, քաղ. Երևան, Մարշալ Բաղրամյան պողոտա 26 և Հանրապետության հրապարակ, Կառավարական տուն 1:
Վարչապետ Նիկոլ Փաշինյանը որոշման հետ կապված որոշակի պարզաբանումներ ներկայացրեց: Նա նշեց, որ տվյալ որոշումն ընդունում են զուտ օրենքի՝ ըստ էության տեխնիկական պահանջը կատարելու համարւ, բայց տարօրինակ իրավիճակ է:
«Կառավարությունը, պարզ է, մի շենքում կարող է տեղակայված չլինել, բայց որ վարչապետը երկու շենքում տեղակայված լինի, իսկապես մի փոքր տարօրինակ իրավիճակ է: Ես ուզում եմ հստակ արձանագրել, որ մենք ամենևին չենք մոռացել՝ ինչն ենք քննադատել: Որոշակի կարծիքներ են հնչում, թե մենք, կառավարությունում հայտնվելով, մոռացել ենք՝ ինչն ենք քննադատել. դա այդպես չէ: Այն, ինչ քննադատել ենք, ժամանակի ընթացքում իրականություն կդարձնենք», – ասաց նա:
Փաշինյանը կարծիք հայտնեց, որ պետք է հարցերին ոչ թե անձնավորված, այլ ինստիտուցիոնալ մոտեցումներ ցուցաբերել: Նրա համոզմամբ՝ վարչապետը պետք է հրաժարվի Բաղրամյան 26-ի նստավայրից, և այն ժամանակի ընթացքում կվերադարձնեն նախագահի աշխատակազմին, ինչպես նախկինում եղել է: Վարչապետը հայտնեց, որ այս պահին մի քանի արարողակարգային խնդիրներ կան լուծելու. նոր սահմանադրությամբ վարչապետն է պետության ղեկավարը, և արարողակարգային որոշակի պարտականություններ կան, որոնք կապված են շենքային պայմանների հետ:
Փաշինյանը խոստացավ՝ առաջիկա հնարավորինս կարճ ժամանակահատվածում կլուծեն այս հարցը:
«Ես աշխատում եմ կառավարությունում, դա նաև հարմար է, հետագայում նաև կառավարության որոշումներով կարձանագրենք, վարչապետը կունենա մեկ նստավայր, Բաղրամյան 26-ը կվերադարձվի նախագահի աշխատակազմին»,- ասաց նա: