Այս տարի արդեն 22 000 տոննա ծիրան կա արտահանված. Հրաչ Բերբերյան
Պտղի արտահանման համար տարին վատը չի: Այսօր հրավիրված ասուլիսին ասաց Ագրարագյուղացիական միավորման նախագահ Հրաչ Բերբերյանը: Ըստ նրա՝ ծիրանի բեռն այս տարի շատ ավելին կլիներ, եթե փոշոտումը լավ լիներ, որը անձրևների պատճառով էր:
«Բայց ծիրանի բերքը նորմալ է. խոշոր, առողջ, մեծ ծիրան է»,-ասաց նա:
Հրաչ Բերբերյանը նշեց, որ եթե անցյալ տարի արտահանվել էր 30 հազար տոննա ծիրան, այս տարի արդեն 22 000 տոննա ծիրան կա արտահանված: «Բայց եթե անցյալ տարի հունիսի 10-ից են սկսել արտահանել, այս տարի 25 օր շուտ են սկսել՝ մայիսի 15-ից, և արտահանել են 22 000 տոննա»,-ասաց նա՝ նշելով, թե կասկածում է, որ նախորդ տարվա ցուցանիշների վրա, և այս տարի էլ Գյուղնախարարությունը աճպարարություն է անում՝ ասելով, թե նախորդ տարվա նույն ժամանակահատվածի համեմատ 5 անգամ ավելի են արտահանել՝ չնշելով, որ շուրջ 1ամիս շուտ են սկսել արտահանել:
Կեռասն, ըստ Բերբերյանի տվյալների, 30%-ով պակաս է արտահանվել:
Անդրադառնալով կաթի մթերման հետ կապված խնդրին՝ Հրաչ Բերբերյանը բացատրեց, թե ինչու են կաթարտադրողները բողոքում, երբ անցյալ տարվա նույն ժամանակահատվածի համեմատ ավելի բարձր գնով են կաթ մթերում:
Ըստ նրա՝ եթե 1 տարի առաջ «Կարեն Կարապետյանի ղեկավարած կառավարությունը հասավ նրան», որ 70 000 գլուխ խոշոր անասուներ պակասեցին, որից 30 000-ը կթու կովերն էին, բնականաբար, պետք է դա բերեր կաթի քիչ արտադրության, այսինքն՝ գնի աճի:
«Հիմա գյուղացին պետք է փորձեր գլխաքանակը վերականգնել, բայց 150 դրամով չի կարող, և եթե 110, 120 դրամից դարձել է 150, բնական է, որ բողոքում են»,-ասաց նա:
Ըստ նրա՝ հարցը 1 օրում հնարավոր է լուծել, եթե նոր կառավարությունը մասնագետ ունենա: «Հայտարարել են, որ միջգերատեսչական հանձնաժողով է ստեղծվելու... էշ մի սատկի, գարուն կգա, մի ժամվա լուծելու հարց է»,-ասաց նա: