Տվյալներ են ձեռք բերվել, որ «Շիրակի» մարզիչը կաշառել է «Բանանցի» ֆուտբոլիստին. գլխավոր դատախազություն
«Շիրակ» ֆուտբոլային ակումբի մարզիչ Արարատ Հարությունյանը կասկածվում է «Բանանցի» ֆուտբոլիստին կաշառելու մեջ:
Գլխավոր դատախազության հանրային կապերի բաժնից հայտնեցին, որ մայիսի 5-ին Երևան քաղաքի դատախազությունից ՀՀ քրեադատավարական կարգով նյութեր նախապատրաստելու և ընթացքը լուծելու հանձնարարությամբ ՀՀ ոստիկանության Երևան քաղաքի վարչություն էր ուղարկվել «a1plus.am» կայքի «ՀՖՖ-ն «Շիրակից» հանել է 12 միավոր, իսկ աշխատակցին որակազրկել ցմահ» վերտառությամբ նույն օրը հրապարակված հոդվածը' «Շիրակ» ՖԱ-ի մարզիչ Արարատ Հարությունյանի կողմից «Բանանց»-«Շիրակ» ֆուտբոլային ակումբների հանդիպման ժամանակ դիտավորյալ սխալներ թույլ տալով խաղի արդյունքի վրա ազդելու նպատակով «Բանանց» ՖԱ-ի ֆուտբոլիստ էդվարդ Կպոդոյին կաշառք տալու վերաբերյալ:
Այդ առթիվ նյութերի նախապատրաստման ընթացքում տվյալներ են ձեռք բերվել, որ մայիսի 3-ին Երևան քաղաքի Սեբաստիա փողոցի վրա գտնվող «Երևան Սիթի» սուպերմարկետի մոտ' ավտոմեքենայի մեջ, «Շիրակ» ՖԱ-ի մարզիչ Արարատ Հարությունյանը մայիսի 5-ին կայանալիք «Բանանց»-«Շիրակ» ֆուտբոլային ակումբների արհեստավարժ մարզամրցման ժամանակ դիտավորյալ սխալներ թույլ տալով խաղի արդյունքի վրա ազդելու նպատակով կաշառել է «Բանանց» ՖԱ-ի արհեստավարժ ֆուտբոլիստ էդվարդ Կպոդոյին' տալով 1.000 ԱՄՆ դոլար գումար և խոստացել է «Շիրակ» ֆուտբոլային ակումբի կողմից նշված ֆուտբոլային խաղը հաղթելու դեպքում տալ ևս 4 հազար ԱՍՆ դոլար գումար:
Դեպքի առթիվ 2018 թվականի մայիսի 21-ին ՀՀ ոստիկանության Երևան քաղաք վարչությունում ՀՀ քրեական օրենսգրքի 201-րդ հոդվածի 1-ին և 3-րդ մասերով հարուցվել է քրեական գործ:
Վարույթն իրականացնող մարմնի հունիսի 22-ի որոշմամբ Ա.Հարությունյանի նկատմամբ ՀՀ քրեական օրենսգրքի 201-րդ հոդվածով (Արհեստավարժ մարզամրցումների և հանդիսադիր առևտրային մրցույթների մասնակիցներին ու կազմակերպիչներին կաշառելը) նախատեսված հանցավոր արարքը կատարելու կասկածանքով որպես խափանման միջոց է ընտրվել ստորագրություն չհեռանալու մասին:
Նախաքննությունը շարունակվում է: