Էջմիածնում իրավիճակի լուծման 3 տարբերակ եմ տեսնում. Արմավիրի մարզպետը պատասխանում է լրագրողների հարցերին (տեսանյութ)
Էջմիածնի քաղաքապետ Կարեն Գրիգորյանն արդեն գտնվում է Արմավիրի մարզպետարանում: Մարզպետը լրագրողների հետ զրույցում նշեց, որ իրենք սպասում են նաև քաղաքապետի հրաժարականը պահանջող կողմի ներկայացուցիչներին՝ օպտիմալ լուծում գտնելու համար:
«Քանի նոր Էջմիածինը բոլոր հայերի սուրբ քաղաքն է, նաև թեմի առաջնորդն է այստեղ։ Մեծ պատրաստակամությամբ սպասում ենք նաև հրաժարական պահանջողներին, որ միասին գտնենք օպտիմալ լուծումը ստեղծված իրավիճակից»,-ասաց մարզետը։
Մարզպետ Գագիկ Միրիջանյանի խոսքով՝ իրենք դիտարկում են խնդրի լուծման 3 գլոբալ տարբերակ՝ կամ բավարարվում են քաղաքապետի պահանջները, կամ բավարարվում են ցուցարարների պահանջները, կամ պետք է գտնել ճանապարհային քարտեզ, և այդ ճանապարհով փորձել լուծում ունենալ: «Ճանապարհային քարտեզը պետք է լինի միայն ու միայն քննարկումների արդյունքում»,-ասաց Գագիկ Միրիջանյանը:
Նա նշեց, որ Էջմիածնի քաղաքապետարանում դեռ ստուգումներ չեն սկսել, բայց չի բացառվում, որ դա տեղի ունենա. «միայն ու միայն իրավական հիմք ունենալու պարագայում, այն էլ մարզպետարանի կամ տարածքային ինքնակառավարման մարմինների լիազորությունների ներքո»։