Ջավախքցի վարորդների մուտքը Հայաստան կարող է արգելվել
Վերջին օրերին բազմաթիվ զանգեր եմ ստանում ջավախքից ովքեր արդարացիորեն բողոքում են ՀՀ Բավրայի անցակետում տեղի ունեցող գործողությունների հետ կապված, պարզվում է 2018 թվականի հունվարի 1-ից մինչև հունիսի 4-ը ընկած ժամանակահատվածում վրացական պետհամարանիշներով այն ավտոմեքենաների վարորդները ովքեր ճանապարհային երթևեկության կանոնների խախտումներ են կատարել Հայաստանի տարածքում և այդ խախտումները գրանցվել են տեխնիկական միջոցներով, (ժողովրդական լեզվով ասած արագաչափերի և խաչմերուկների կամերաների ակտերը) նշված ժամանակահատվածում, այսինքն` նախորդ 6 ամիսների խախտումների արձանագրությունները ջավախքցի վարորդներին սկսել են ծանուցել հունիսի 4-ից ՀՀ սահմանի Բավրայի անցակետում, ոչ մեկի համար գաղտնիք չէ որ Բավար մաքսակետով անցնող վրացական պետհամարանիշներով ավտոմեքենաների ավելի քան 90% ջավախքցիներն են:
Բողոքող ջավախքցի վարորդները պնդում են, որ իրենք, տեղեկացված են եղել, որ տարվա սկզբից բոլոր օտարերկրյա պետհամարանիշներով ավտոմեքենաների վարորդները խախտումերի վերաբերյալ ծանուցվելու են սահմանակետում, մշտապես հետաքրքրվել են թե ինչու Բավրայի մաքսակետում չեն ծանուցում և ստացել են հավաստիացում, որ նրանց խախտումները կարձանագրվի միայն այն օրվանից, որ օրվանից, որ Բավրայի մաքսակետում պաշտոնապես կսկսեն ծանուցել: Բայց արի ու տես, որ հազարավոր ջավախքցիներ այս օրերին հայտնվել են անելանելի ծուղակում նրանց սկսել են ծանուցել 6 ամսվա վաղեմության տուգանքները և վարորդների մեծ մասի տուգանքների չափը գերազանցում է հարյուր հազարավոր՝ որոշ դեպքերում նույնիս մեկ միլիոն դրամը: Հատկանշական է, որ այս խախտումների հասցեատերերի գերակշիռ մասը տաքսիստներ, մանրածախ առևտրականներ, հիվանդատերեր և ուսանողների ծնողներ են:
Կարծում եմ այս հարցը պետք է օր առաջ լուծում ստանա, ջավախքցի վարորդների տուգանքները պետք է չեղարկվեն և հաշվարկվեն միայն հունիսի 4-ից հետո արված խախտումները, քանզի պետությունը պաշտոնական ծանուցում սկսել է անել հունիսի 4-ից: Հակառակ դեպքում վստահ եմ ջավախքցիները չեն կարողանալու մուծել այդ գումարները և կհայտնվեն Մայր Հայրենիք գալու խնդրի առաջ, որովհետև տուգանքը ծանուցվելուց հետո չմուծելու պարագայում նրանց մուտքը Հայաստան պարզապես կարգելափակվի, իսկ ծանուցում ստանալուց հրաժարվելու դեպքում նույնպես նրանց չեն թույլատրի մտնել Հայաստան: Ցանկացած պարագայում՝ թե իրավական տեսակետից և թե բարոյական առումով ճիշտ չէ մարդու տուգանքները հավաքել և ծանուցել կես տարի հետո:
Ջավախքցիները ինչ ոգևորությամբ որ ընդունեցին ՀՀ վարչապետ Նիկոլ Փաշինյանին, նույն ոգևորությամբ սպասում են այս հարցի լուծմանը:
Խնդիրը լուրջ է ու այժմեական, կարծում եմ հարցին պատշաճ լուծում չտալու պարագայում բազմաթիվ ջավախքցիներ, օրինակ՝ նույն տաքսիստները ովքեր Ախալքալակից կամ Ջավախքի այլ քաղաքներից Երևան էին գնում գալիս մի քանի լարիով օրվա հացը վաստակելու համար՝ կբռնեն արտագնա աշխատանքի ճամփան:
Հ.Գ. Իմ ավտոմեքենան հայկական պետհամարանիշներով է, ես այդ խնդիրը չունեմ, սա էլ գրեցի ավելորդ շահարկումները կանխելու համար:
Արմեն Ավետիսյան. Ֆեյսբուք: