Տ. Կորյուն աբեղա Առաքելյանի հասցեին հնչեցված կարծիքները իրականության հետ որևէ կապ չունեն

Վերջին մեկ շաբաթվա ընթացքում Սուրբ Գայանե վանքի վանահայր Տ. Կորյուն աբեղա Առաքելյանի հասցեին հնչեցին ստապատիր ու զրպարտիչ տեղեկություններ, որոնք իրականության հետ որևէ կապ չունեն և միայն կոչված են վարկաբեկելու նախանձախնդիր ու սիրված հոգևորականին: Որպեսզի լայն հանրությանը հայտնի լինի հայր Կորյունի անձը և տասնհինգ տարվա հովվական գործունեությունը, հարկ ենք համարում հրապարակել նրա կենսագրական տվյալները:

Տ. Կորյուն աբեղա Առաքելյան

Ծնվել է 1973 թվականի հունիսի 30-ին, Գեղարքունյաց մարզի Լուսակունք գյուղում:

1980-1990 թթ.-ին սովորել է Լուսակունքի միջնակարգ դպրոցում:

1992-1994 թթ. ծառայել է ՀՀ զինված ուժերում:

1996-2002 թթ. սովորել է Մայր Աթոռ Սուրբ Էջմիածնի Գևորգյան Հոգևոր Ճեմարանում:
2001 թ.-ի դեկտեմբերի 25-ին,ձեռամբ Շիրակի թեմի առաջնորդ Տ. Միքայել եպիսկոպոս Աջապահյանի, ձեռնադրվել է սարկավագ:

2002 թ.-ին, Գևորգյան Հոգևոր Ճեմարանն ավարտելուց հետո նշանակվել է Մայր Աթոռի պարետի օգնական, այնուհետև՝ Վեհարանի պարետ:

2003 թվականի փետրվարի 27-ին,Սուրբ Վարդանանց տոնին, ձեռամբ Արցախի թեմի առաջնորդ Տ. Պարգև արքեպիսկոպոս Մարտիրոսյանի, ձեռնադրվել է կուսակրոն քահանա:

2003 թ.-ին, Անտիոքի և Համայն Արևելքի Ասորի Ուղղափառ Եկեղեցու պետ Իգնատիոս Զաքքա Ա. Իվաս Պատրիարքի հրավերին ընդառաջ,Գարեգին Բ.Ծայրագույն Պատրիարք և Ամենայն Հայոց Կաթողիկոսի կողմից ուղարկվում է Դամասկոս՝ Ասորի Ուղղափառ Եկեղեցու վանական կյանքին ծանոթանալու համար՝ զուգահեռ ծառայության կոչվելով Դամասկոսի հայոց թեմում՝ ներհամայնքային խնդիրները կարգավորելու և առաջնորդական ընտրությունները կազմակերպելու համար, որի արդյունքում թեմակալ առաջնորդ է ընտրվում Տ. Արմաշ վարդապետ Նալբանդյանը:

2005 թ.-ին, Դամասկոսից Հայաստան վերադառնալուց հետո նշանակվել է Սուրբ Գեղարդավանքում որպես հոգևոր սպասավոր:

2008 թ.-ին նշանակվել է Հառիճավանքի վանահայր: Հառիճի վանական համալիրի վերանորոգչական աշխատանքներն ընթացել են Տ. Կորյուն աբեղա Առաքելյանի անմիջական հետևողականությամբ և գործուն մասնակցությամբ:

2010 թ.-ին Վեհափառ Հայրապետի օրհնությամբ ստեղծվել է Հառիճավանքի վանական միաբանությունը՝ վանահայր Տ. Կորյուն աբեղա Առաքելյանի գլխավորությամբ:

2011 թ.-ին Տ. Կորյուն աբեղա Առաքելյանի՝ Արմավիրի թեմի Մրգաշատ գյուղի հոգևոր հովիվ նշանակվելուց հետո Հառիճավանքի միաբանները տեղափոխվել և առ այսօր իրենց վանական կյանքը շարունակում են Գնդեվանքում՝ որպես Գնդեվանքի ծառայողներ:

2017 թ-ին Տ. Կորյուն աբեղա Առաքելյանը նշանակվել և մինչ օրս ծառայում է Սուրբ Գայանե վանքում՝ որպես վանահայր: