Նիկոլ Փաշինյան. «ՀՔԾ որևէ քննիչի սենյակում որևէ բարձրաստիճան պաշտոնյայի լուսանկար չպետք է լինի»
ՀՔԾ որևէ քննիչի սենյակում որևէ բարձրաստիճան պաշտոնյայի լուսանկար չպետք է լինի, որովհետև ՀՔԾ-ն զբաղվում է այնպիսի գործերով, որոնք կարող են նաև առնչություն ունենալ այդ պաշտոնյայի հետ։ Հատուկ Քննչական ծառայությունում կառույցի աշխատակիցներին նորանշանակ ՀՔԾ պետ Սասուն Խաչատրյանին ներկայացնելիս ասաց ՀՀ վարչապետ Նիկոլ Փաշինյանը:
«ՀՔԾ քննիչների սենյակում պետք է լինեն ՀՀ զինանշանը և դրոշը, և այս սիմվոլները պետք է արտահայտեն այն գործառույթը, որ իրականացվում է ՀՔԾ-ի կողմից», - ասաց նա:
Ապա վարչապետը մի քանի դիտարկումներ արեց՝ ՀՔԾ գործունեության հետ կապված: «Օրենսդրությամբ սահմանված է, որ ՀՔԾ-ն զբաղվում է իրավախախտումներով, հանցագործություններով, որոնք վերագրվում են օրենսդիր, դատական, գործադիր իշխանության ներկայացուցիչներին, և հաջորդ ամենակարևոր գործառույթը ընտրական հանցագործությունների հետ կապված գործերն են։
Այս շրջանակն արդեն ցույց է տալիս այն բացառիկ կարևորությունը, որ ունի Հատուկ քննչական ծառայությունը մեր կյանքում և ընդհանրապես իրավակարգի ապահովման բնագավառում», - ասաց Նիկոլ Փաշինյանը:
Նիկոլ Փաշինյանն ընդգծեց, որ ինքը, որպես Հայաստանի ժողովրդի վստահությամբ վարչապետ դարձած մարդ, նաև վստահեցնում է՝ ինչ-որ հայտարարում են հրապարակային, այն է, ինչ կա իրենց մտքում։
«Ի՞նչ նկատի ունեմ: Երբ որ ասում ենք, որ օրենքի առաջ բոլորը հավասար են, նկատի ունենք, որ օրենքի առաջ բոլորը հավասար են, և նկատի չունենք, որ ոմանք օրենքի առաջ ավելի հավասար են։ Երբ ասում ենք, որ Հայաստանից պետք է արմատախիլ արվի կոռուպցիան, նկատի ունենք, որ Հայաստանից պետք է արմատախիլ արվի կոռուպցիան, նկատի չունենք, որ որոշ տեղերում կոռուպցիան կարող է գոյություն ունենալ։
Ուզում եմ հստակ ընդգծել, որ ՀՔԾ-ի առաջ դրված է այս խնդրի ապահովման մի հսկայական մասը, և ես հույս ունեմ, որ ՀՔԾ-ն կիրականացնի իր այդ գործառույթը»։
Հիշեցնենք, որ ՀՔԾ նորանշանակ պետ Սասուն Խաչատրյանը «Մհեր Խաչատրյան և գործընկերներ» փաստաբանական գրասենյակի տնօրենն է եղել:
Հունիսի 8-ին, կառավարության որոշմամբ, Վահրամ Շահինյանն ազատվել էր Հատուկ քննչական ծառայության պետի պաշտոնից` սեփական դիմումի համաձայն։