«ՀՔԾ-ի ամենակարևոր գործերից մեկը Մարտի 1-ի բացահայտումն է». Նիկոլ Փաշինյան

Ամենակարևոր գործերից մեկը, որ պետք է անի ՀՔԾ-ն,  մարտի 1-ի սպանությունների բացահայտումն է: Այս մասին այսօր Հատուկ քննչական ծառայությունում ներկայացնելով ՀՔԾ-ը նորանշանակ պետ Սասուն Խաչատրյանին՝ ասաց վարչապետ Նիկոլ Փաշինյանը:

«Ես ուզում եմ հստակ ասել, երբ ասում ենք, որ չկան և գոյություն չունեն սահմանափակումներ, ուրեմն չկան, և եթե նախկինում եղել են այնպիսի գործեր, որոնք ինչ-ինչ պատճառներով, քաղաքական, մերձքաղաքական պատճառներով կամ այլ օբյեկտիվ և սուբյեկտիվ պատճառներով առաջ չեն գնացել, ես հույս ունեմ որ քննիչները ՀՔԾ նոր պետի ղեկավարությամբ կանդրադառնան այդ բոլոր գործերին՝ Հայաստանում լիարժեք իրավակարգ ապահովվելու նպատակներից ելնելով»- ասաց վարչապետը:

ՀՔԾ արդեն նախկին պետ Վահրամ Շահինյանն էլ իր խոսքում շնորհակալություն հայտնեց վարչապետին և ընդգծեց՝ հայրենիքին ծառայելը մեծ պատիվ է և երանի նրանց, ովքեր իրենց գործունեությամբ, ծառայությամբ կարողացել են արդարացնել այդ մեծ պատիվը:

Վահրամ Շահինյանը վստահեցրեց՝ սկզբունքային, պրոֆեսիոնալ և բարձր բարոյական հատկանիշներ ունեցող կոլեկտիվ է թողնում, որը ժամանակի պահանջներին համահունչ իրականցրել է իր գործառույթը՝ ոչ միայն ծանր և առանձնապես ծանր հանցագործությունների քննության ոլորտում՝ այլև կոռուպցիայի դեմ պայքարի աշխատանքներում:

«Քիչ ղեկավարներ կարող են հպարտանալ, որ իրենց ծառայության ընթացքում այդքան հաջողություններ չեն արձանագրել կոռուպցիայի դեմ պայքարում, որքան ՀՔԾ-ն»,- ասաց նա՝ շնորհակալություն հայտնելով ՀՔԾ անձնակազմին՝ համատեղ աշխատանքի համար:

Միևնույն ժամանակ Վահրամ Շահինյանը շնորհավորեց նորանշանակ պետ Սասուն Խաչատրյանին՝ նշանակման առիթով և հավելեց. «Պարոն Խաչատրյան, մեծ պատիվ է Ձեզ համար նման կոլեկտիվ ղեկավարելը և համոզված եմ, որ ժամանակի այն պահանջները, որ դրվել են Հատուկ քննչական ծառայության առջև, Դուք պատվով կիրականացնեք»:

Նորանշանակ պետ Սասուն Խաչատրյանը ևս շնորհակալություն հայտնեց Վահրամ Շահինյանին՝ մեկ հարկի տակ պրոֆեսիոնալ քննիչներ հավաքելու համար:

Նա նաև նշեց, որ շուրջ 20 տարվա իր գործունեության ընթացքում առնչվել է գրեթե բոլորի հետ՝ և՛ որպես մանկավարժ, և՛ որպես դատախազ, և՛ որպես քննիչ աշխատելու տարիներին և համոզմունք հայտնեց, որ այս կոլեկտիվը կարող է լուծել ցանկացած բարդության խնդիր:

Իսկ կամքն այդ խնդիրները լուծելու կա:

«Շնորհակալ եմ նման պատասխանատու աշխատանք վստահելու համար, վստահեցնում եմ, որ պատվով կկատարենք ՀՔԾ-ի առջև ծառացած բոլոր խնդիրները»,- եզրափակեց ՀՔԾ պետ Սասուն Խաչատրյանը: