на Русском
Հենրի Քավիլն առաջին անգամ հայր կդառնա
Ոստիկանությունը տեսանյութ է ներկայացրել Արթիկ... 
Ձեզ վրա վերևից ճնշումներ գործադրվե՞լ են այս կամ այն որոշումը կայացնելիս. Միքայել Մելքումյանը՝ ՍԴ դատավորի թեկնածուին
Այսքան տարի աշխատելով դատական համակարգում՝ Ձեզ վրա վերևից ճնշումներ գործադրվե՞լ են այս կամ այն որոշումը կայացնելիս. ԱԺ-ում Սահմանադրական դատարանի դատավորի ընտրության հարցի քննարկմանը թեկնածու, ՀՀ Վճռաբեկ դատարանի քրեական պալատի դատավոր Ելիզավետա Դանիելյանին դիմելով՝ հարցրեց «Ծառուկյան» խմբակցության պատգամավոր Միքայել Մելքումյանը:
«Հայտնի է, որ դատական համակարգում այդ պրակտիկան կա, որևէ մեկը չի կարող հերքել»,-ասաց նա և նա հետաքրքրվեց, թե ինչպես է գնահատում այն գործընթացները, երբ խափանման միջոցները փոխվում են, և մարդիկ դուրս են գալիս:
«Հնարավո՞ր է, որ դա լիներ, եթե իշխանությունը չփոխվեր»,-հարցրեց նա:
Ելիզավետա Դանիելյանը պնդեց, որ երբևէ դատական պրակտիկայի ընթացքում անձամբ ինքը չի առնչվել որևէ իրավիճակի հետ, երբ վերևից որևէ այլ մարմնի կողմից փորձ կատարվեր ազդեցություն ունենալ կամ ուղղորդվեր դատական պրակտիկան:
«Այդպես է եղել Առաջին ատյանի դատարանում աշխատած ժամանակաշրջանում, և առավել ևս, իմ պատկերացմամն՝ գրեթե անհնար է եղել կոլեգիալ մարմնի որոշում կայացնելու փուլում»,-ասաց նա:
Ինչ վերաբերում է ներկայում ընթացող դատավարություններին, ապա նա ասաց, որ դրանք շատ նորմալ պրոցեսներ են:
«Բոլոր այդ պրոցեսները նախատեսված են դատավարական օրենսդրությամբ, որևէ գործառույթ չի իրականացվում օրենսդրությունից դուրս, և ասել, որ հատուկ իրադարձություն է տեղի ունեցել, դրա համար են փոփոխվում այդ խափանման միջոցները, կարծում եմ՝ տեղին չէ»,-ասաց նա և հավելեց, թե այլ բան է, որ միգուցե վերլուծեն և հասկանան, թե դատավորներն ինչու չէին կարողանում իրականացնել դատավարությունները: Ըստ նրա, դա այն պատճառով էր, որ տարբեր խոչընդոտների էին հանդիպում՝ փաստաբանները չէին գալիս և այլն:
«Հիմա ամեն ինչ հանդարտվել է, ուրախալի է, որ մարդիկ հայտնվում են ազատության մեջ»,-ասաց նա:
Միքայել Մելքումյանն արձագանքեց, թե այսինքն՝ մի պայման է փոխվել, որ այն պրոցեսները, որոնք լինում են, մինչև հիմա չկային:
«Այսինքն՝ ինչ-որ ճնշումներ եղել են, եկեք անկեղծ ասենք էլի: Եթե այդպես է, հիմա ի՞նչ պրոցես է գնում: Ես կխնդրեի, անկեղծ ասեք, դրանից շատ բան է կախված»,-ասաց նա:
ՍԴ դատավորի թեկնածուն պատասխանեց. «Ես չեմ պատկերացնում, որ անկեղծությունը անպայման այն պատասխանը հնչեցնելն է, որը մոդայիկ կլիներ, իմ պրակտիկայում չի եղել: Դատական համակարգում 230 դատավոր է աշխատում, միգուցե, բայց ինձ հետ նման բան չի եղել»,-պնդեց նա:
