«Ղարաբաղ Տելեկոմ»-ի իջեցված սակագները հաստատվել են

Այսուհետ հետվճարային բաժանորդների համար զանգերը դեպի «Ղարաբաղ Տելեկոմ» -ի բջջային եւ անշարժ ցանց, դեպի ՀՀ բջջային ցանցեր, դեպի ՀՀ անշարժ ցանցեր կնվազեն 15 %-ով:

Որոշումը հաստատվել է հունիսի 8-ին, Արցախի հանրային ծառայությունները եւ տնտեսական մրցակցությունը կարգավորող պետական հանձնաժողովի (ԱՀ ՀԾՏՄԿՊ) նիստիժամանակ: 

Ինչ վերաբերում է կանխավճարային բաժանորդներին, ապա զանգերը դեպի «Ղարաբաղ Տելեկոմ»-ի բջջային եւ անշարժ ցանցեր, զանգեր դեպի ՀՀ բջջային ցանցեր եւ դեպի ՀՀ անշարժ ցանցեր եւս կնվազի 15 %-ով: Կարեւոր նվազումներից է լինելու նաեւ 50 %-ով հետվճարային քարտերի ամսավճարի իջեցումը, որն այսօր կազմում է 1000 դրամ:

«Արցախպրես»-ի թղթակցի հաղորդմամբ՝ «Ղարաբաղ Տելեկոմ» ընկերության գլխավոր տնօրեն Կարեկին Օդաբաշյանը նշել է, որ այսօրվա նիստը մայիսի 23-ին լրագրողների հետ ունեցած հանդիպման շարունակությունն է:
«Մենք շարունակելու ենք սակագների իջեցումը՝ հավասարակշռելով մեր եկամուտներն ու ծախսերը: Կհայտարարենք նաեւ նոր փաթեթների մասին, որոնք թույլ կտան մեր բաժանորդներին խնայել իրենց տնտեսական հեռահաղորդակցության բյուջեն 20-90 %-ով»,- ասել է Կ. Օդաբաշյանը:

 Ռոումինգի հարցը եւս քննարկվում է, սակայն Օդաբաշյանի խոսքով այն կախված չէ միայն իրենցից: Հայաստանում կա 3 օպերատոր, որոնց հետ արդեն իսկ համագործակցում են:

«Հուսով եմ՝ մինչեւ տարեվերջ պետք է կարողանանք հայտարարել ռոումինգի նոր սակագնային քաղաքականության մասին: Այսօրվա 3-րդ սերնդի համացանցը, որ ունի 50 ՄԳ արագություն, հզորանալու է՝ դառնալով 500 ՄԳ: Մեր երրորդ ցանցի 20 կայանների թիվը առաջիկա 18 ամիսների ընթացքում 10 միլիոն եվրոյի ներդրման շնորհիվ կավելանա 40-ով»,- ավելացրել է Կ. Օդաբաշյանը:

Ըստ ՀԾՏՄԿՊ ներկայացված զեկույցի՝ որոշումը ուժի մեջ կմտնի ընթացիկ տարվա սեպտեմբերի 1-ից: