Համաշխարհային ֆուտբոլի գերաստղերը՝ Հայաստանում
Ընթացքի մեջ են Հայաստանում կայանալիք լեգենդների հանդիպման նախապատրաստական աշխատանքները: Այս մասին այսօր՝ հունիսի 5-ին, լրագրողների հետ հանդիպման ժամանակ ասաց կազմակերպիչը՝ ռուսաստանցի գործարար, Երևանի «Փյունիկ» ֆուտբոլային ակումբի սեփականատեր Արթուր Սողոմոնյանը: Նա նշեց հանրահայտ այն ֆուտբոլիստների անունները, որոնք մասնակցելու են հուլիսի 8-ին Երևանում կայանալիք խաղին և որոնց հետ դեռ բանակցությունները շարունակվում են:
«Ցանկություն են հայտնել շատերը, շատերն արդեն հաստատել են մասնակցությունը, պայմանագրեր են կնքել, և նրանց անունները կարող եմ տալ. Լատինական Ամերիկայից՝ Ռիվալդոն, Կաֆուն, Բատիստուտան, Կրեսպոն, Դիդան դարպասում, Սամորանոն, Կորդոբան, Սերժինյոն, Ձանետին մեծ ցանկություն է հայտնել, բայց նա արգենտինական հեռուստաընկերության մեկնաբանն է, պետք է հստակեցնի՝ որ քաղաքից է գալու, Եվրոպայից՝ Մալդինին, Ջորկաեֆը: Շատերի հետ հիմա բանակցություններ են ընթանում: Նրանցից են Խրիստո Ստոիչկովը, Ժյուլին, Լիտմանենը, Ռայան Գիգսը, Ալբերտինին: Հիմա մենք պատասխանի ենք սպասում Մաթեուսից, Պույոլից, Տոտիինց: Տոտին էլ գալու մեծ ցանկություն է հայտնել: Հուսով եմ՝ համաձայնության կգանք: Լատինական Ամերիկայից բանակությունները ընթացքի մեջ են Ռոբերտո Կարլոսի և Կակայի հետ»,- ասաց նա: