Ապամենաշնորհացումը Հայաստանի տնտեսական աճի հզոր խթան կդառնա․ ՎԶԵԲ տարածաշրջանային տնօրեն
Միջազգային ֆինանսական ազդեցիկ հաստատություններից մեկի՝ Վերակառուցման եւ զարգացման եվրոպական բանկի Արեւելյան Եվրոպայի եւ Կովկասի գծով տնօրեն Ֆրենսիս Մալիժը հայտարարում է՝ հայաստանյան տնտեսությունում բազմաթիվ են մենաշնորհները, եւ ապամենաշնորհացումը Հայաստանի տնտեսական աճի հզոր խթան կհանդիսանա:
Այսօր «Ազատության»-ը տված հարցազրույցում ՎԶԵԲ-ի բարձրաստիճան ներկայացուցիչն ասաց՝ Հայաստանի նախկին իշխանությունների հետ բազմիցս են քննարկել մենաշնորհների հարցը, սակայն ընդհանուր պատասխան էին ստանում, թե դա դժվար լուծվող հարց է:
«Ընդհանուր առմամբ, մենաշնորհը վատ բան է, որովհետեւ դա նշանակում է՝ մարդիկ շատ են վճարելու: Եթե մենաշնորհ կա մրգերի ներմուծման ոլորտում, պետք է թանկ վճարեք այդ մրգերի համար: Մենաշնորհները գերշահույթ են ստեղծում մենաշնորհների տերերի համար եւ լրացուցիչ ծախսեր՝ մյուսների համար: Գաղտնիք չէ, որ Հայաստանի տնտեսությունում կան բազմաթիվ մենաշնորհներ, եւ ապամենաշնորհացումը մենք համարում ենք տնտեսական հետագա աճի հզոր խթան: Ո՞վ կցանկանա մրցել մոնոպոլիստների հետ, մարդիկ նախընտրում են արտագաղթել»,- ասաց Ֆրենսիս Մալիժը:
«Ազատության» հարցին՝ քննարկե՞լ եք արդյոք մենաշնորհների խնդիրը Հայաստանի նախկին կառավարության հետ Մալիժն այսպես արձագանքեց․ «Մենք քննարկել ենք այս հարցը նախկին կառավարությունների հետ: Ընդհանուր պատասխան էինք ստանում, թե՝ այո, այդ հարցը կարեւոր է, մենք պետք է ինչ-որ բան անենք, սակայն դա դժվար է լուծել»:
ՎԶԵԲ-ի բարձրաստիճան ներկայացուցչի խոսքով, հեղափոխությունից հետո սփյուռքահայ ներդրողների շրջանում վերստին հետաքրքրություն է առաջացել հայաստանյան տնտեսության նկատմամբ: «Ընդհանուր առմամբ, դեռ վաղ է ասել՝ ինչ ազդեցություն կթողնի հեղափոխությունը Հայաստանի տնտեսության վրա: Կարծում եմ՝ այն, որ տեղի ունեցավ իշխանության խաղաղ փոխանցում, նշանակալի իրադարձություն էր․ ողջ աշխարհը հետեւում էր Հայաստանին եւ ականատեսը եղավ խաղաղ իշխանափոխության, ինչը ձեռքբերում է եւ խոսում է հայաստանյան հանրության, ժողովրդավարական ինստիտուտների հասունության մասին: Տեսնում ենք, որ ի հայտ են եկել մարդիկ, ովքեր հստակորեն խոսում են կոռուպցիայի դեմ պայքարի, տնտեսության ապամենաշնորհացման մասին: Սրանք լավ բաներ են: Տեսնենք, թե ինչպիսի գործողություններ կլինեն»,- նշեց Ֆրենսիս Մալիժը:
Վերջինիս այսօր առավոտյան ընդունել է վարչապետ Նիկոլ Փաշինյանը: Մալիժը հավաստիացրեց՝ բանկի հայաստանյան ծրագրերը շարունակվելու են: «Սպասում եմ, որ լավ տարի կլինի Հայաստանի տնտեսության համար: Տեսնում եմ՝ ոգեւորություն, խանդավառություն կա հայաստանցիների շրջանում: Այստեղ տնտեսությունում որեւէ ցնցում չնկատվեց, այնպես, ինչպես, օրինակ՝ Ուկրաինայում, երբ մի քանի տարի առաջ այնտեղ իշխանափոխության, ապա պատերազմի հետեւանքով տնտեսությունում ցնցումներ գրանցվեցին: Հայաստանի պարագայում տեսնում եմ, որ մարդիկ պատրաստակամ են ներդրումներ կատարել»: