Գյուղնախարարը IFAD-ի ղեկավարին ներկայացրել է Հայաստանում գյուղատնտեսության զարգացման տեսլականը

ՀՀ գյուղատնտեսության նախարար Արթուր Խաչատրյանն այսօր ընդունել է Գյուղատնտեսության զարգացման միջազգային հիմնադրամի (IFAD) Հյուսիսային Աֆրիկայի եւ Եվրոպայի ստորաբաժանման հայաստանյան ծրագրերի տարածաշրջանային ղեկավար Նույֆել Թելահիգի գլխավորած պատվիրակությանը:

Գյուղնախարարությունից հայտնում են, որ հանդիպմանը մասնակցում էին նախարարի տեղակալ Արմեն Հարությունյանը, հիմնադրամի տեխնիկական գծով ղեկավար Փիթեր Քրիսթիանսենը եւ պաշտոնատար այլ անձինք:

Ողջունելով ներկաներին՝ նախարար Արթուր Խաչատրյանը համառոտ ներկայացրել է Հայաստանում գյուղատնտեսության զարգացման տեսլականը՝ մասնավորապես կարեւորելով փոքր եւ միջին գյուղացիական տնտեսությունների զարգացումը եւ շուկաների ու դրանց համար ֆինանսական միջոցների հասանելիության ապահովումը: Անդրադարձ է կատարվել նաեւ գյուղատնտեսության ոլորտում ժամանակակից տեխնոլոգիաների ներդրմանը, անասնապահության զարգացմանը, տեղական գյուղմթերքի արտադրության եւ արտահանման ծավալների ավելացմանը, ինչպես նաեւ չմշակվող հողերի խնդրին:

Նույֆել Թելահիգը վերահաստատել է պատրաստակամությունը ՀՀ գյուղատնտեսության նախարարության հետ համատեղ նոր ծրագրերի մշակման եւ իրականացման գործում, որոնք համահունչ կլինեն ոլորտի ներկայիս առաջնահերթություններին եւ գերակա խնդիրներին:

Զրույցի ընթացքում կողմերը քննարկել են երկկողմ հետաքրքրություն ներկայացնող մի շարք այլ հարցեր եւս: