Չգիտեմ, թվեր չեմ ֆիքսում ընդհանրապես. Տիգրան Ուրիխանյանը պատասխանում է ինտելեկտուալ հարցերի

Operativ.am-ի ինտելեկտուալ հարցերին պատասխանում է ԲՀԿ պատգամավոր Տիգրան Ուրիխանյանը: Պատմությանը վերաբերող հարցերին նա դժվարացավ պատասխանել՝ ասելով, որ ինքն ավելի լավ է լեզվաբանության ոլորտում:

-Ըստ հայկական ավանդության' ո՞ւմ անունից են առաջացել «Արմեն» և «Արմենիա» անվանումները:

-«Արմենիա»-ն Հայաստանի Հանրապետության այլալեզու անվանումն է: Հնագույն ցեղերից մեկի անունից է (ստույգ պատասխանն է Արմենոսի անունից):

-Երգեց, պարեց, գնում է. այս բառերը ի՞նչ խոսքի մասի են պատկանում:

-Բայ են: Լեզվաբանությունից ինչ ուզում եք հարցրեք:

-Կնշեք, թե որոնք են գոյականական անդամի լրացումները:

-Չգիտեմ, hրաժարվում եմ պատասխանից, օգտվում եմ իմ սահմանադրական իրավունքից (գոյականանական անդամի լրացումներն են որոշիչը, բացահայտիչը և հատկացուցիչը):

-Կարող եք ասել, թե ի՞նչ է իրենից ներկայացնում «Որոգայթ Փառացը»:

-Ոչ, չեմ կարող:

-Ո՞ր հեղինակի գրչին է պատկանում «Խոնարհ աղջիկը», «Ալպիական մանուշակ», «Մթնաձոր» ստեղծագործությունները:

-Ոչ, չեմ կարող ասել:

-Ե՞րբ են Հայաստանում ընդունվել խորհրդային կարգերը:

-1920թվականին:

-Բաքվում ե՞րբ է  տեղի ունեցել հայ բնակչության կոտորածը և տեղահանությունը:

-1990 թվականին:

Կարո՞ղ եք ասել՝ այս հատվածը Մ. Նալբանդյանի ո՞ր ստեղծագործությունից է:

Ես պիտի դուրս գամ դեպի հրապարակ,
Առանց քնարի, անզարդ խոսքերով,
Ես պիտի գոչեմ, պիտի բողոքեմ,
Խավարի ընդդեմ պատերազմելով:

-Ոչ:

-Ո՞վ է Մարտիրոս Սարյանի արձանի քանդակագործը:

-Չգիտեմ (ճիշտ պատասխանն է Լ. Թոքմաջյան):

-Ե՞րբ է կնքվել Սևրի պայմանագիրը:

-Չգիտեմ, թվեր չեմ ֆիքսում ընդհանրապես:

Զրույցի ընթացքում Տիգրան Ուրիխանյանն ասաց. «Ես կարող եմ խոսել Լուկա Ֆերարի նկարներից, Շեքսպիրի ստեղծագործություններից, թվարկել Բեթհովենի սոնատները, կարող եմ Առաջին աշխարհամարտից դրվագներ, Հայրենական պատերազմից պատմություններ պատմել, բայց իմ ինտելեկտուալ կարողությունները անսահմանափակ չեն»:

Զրուցեց Նազենի Բաղդասարյանը