Ունեցել ենք 1 տրիլիոն 5050 միլիարդ դրամ ծախս, որը 56 միլիարդով ավելի է, քան 2016թ.-ի ցուցանիշը. Ատոմ Ջանջուղազյան
Ազգային ժողովում մեկնարկել է 2017թ.-ի բյուջեի կատարողականի քննարկումը: Առաջինը հաշվետվություն ներկայացրեց ՀՀ ֆինանսների նախարար Ատոմ Ջանջուղազյանը: Նա նախ նշեց, որ հաջորդ տարվանից սկսած բյուջեն ու կատարողականը ներկայացնելիս հիմնական շեշտադրումը կատարվելու է արդյունքային ցուցանիշների վրա:
Ատոմ Ջանջուղազյանն ասաց, որ մակրոմիջավայրի վրա ազդել է պղնձի համաշխարհային գների դինամիկան, որն աճել է 2016թ.-ից հետո և դրական գործոն հանդիսացել:
Մակրոմիջավայրի վրա, նախարարի խոսքով, ազդել են նաև սերտ հարաբերությունները ռազմավարական դաշնակից Ռուսաստանի հետ, որի համար էական նշանակություն ունեն նավթի համաշխարհային գները:
Ռուսաստանի հետ, Ատոմ Ջանջուղազյանի խոսքով, մեզ կապում են մասնավոր տրանսֆերտները, առևտրաշրջանառությունը, ուղղակի ներդրումները, որոնք էական ազդեցություն են ունենում տնտեսության վրա:
«Արձանագրվել է 7,5 տոկոս իրական տնտեսական աճ, թեև ակնկալվում էր մոտ 3 տոկոսը: Սա պայմանավորված է Ռուսաստանի տնտեսական աճի տեմպերի կանխատեսվածից ավելի բարձր լինելու հանգամանքով: Ռուսաստանի դաշնությունից նշանակալի գործոն հանդիսացող տրանսֆերտների դինամիկան աճել է շուրջ 18 տոկոսով: 663 միլիոն դոլարով պակաս տրանսֆերտներ ենք ստացել: Դրամ-ռուբլի երկկողմանի փոխարժեքի զարգացումները ևս շատ կարևոր են առևտրաշրջանառության տեսանկյունից: Արտահանման 44,6 տոկոսի աճ ենք ունեցել, արձանագրվել է դրամի արժևորում»,- նշեց Ջանջուղազյանը:
Ֆինանսների նախարարը հայտնեց, որ կառավարությունը իր լիազորությունների շրջանակներում աճ է կանխատեսել եկամուտների համար, քան բյուջեի մասին օրենքով էր պայմանավորված:
«Տնտեսական զարգացումները թելադրում էին, որ եկամուտների մասին ծրագիրը փոքր-ինչ համեստ էր: Կառավարությունը ավելացրել է եկամտային մասն ու ծախսային մասը: Վերջինի ավելացումը պայմանավորված է եղել արտաքին աջակցությամբ իրականացվող ծախսերի ավելացմամբ: Ունեցել ենք 1 տրիլիոն 5050 միլիարդ դրամ ծախս, որը 56 միլիարդով ավելի է, քան 2016թ.-ի ցուցանիշը: Կատարողականը ցածր է»,- ասաց Ատոմ Ջանջուղազյանը: