Որքան հասկանում եմ՝ այդ խնդիրները լուծում չեն ստանում և հաջորդ շաբաթ նորից կայցելեմ Գյումրի. ԿԳ նախարարը՝ ՇՊՀ-ի մասին
Կարծում եմ՝ մարդիկ կան, որ ուզում են աընդհատ կոնֆլիկտային վիճակը շարունակվի, բայց ամեն ինչ կլինի ԿԳ նախարարության վերահսկողության տակ: Այս մասին, այսօր՝ մայիսի 27-ին, Լոռու մարզում ՍՄԱՐԹ կրթական կենտրոնի բացման ժամանակ լրագրողների հետ զրույցում նշեց ԿԳ նախարար Արայիկ Հարությունյանը՝ անդրադառնալով փաստին, որ չնայած Շիրակի պետական համալսարանի ռեկտորը հրաժարական է տվել, սակայն կոնֆլիկտային իրավիճակը շարունակվում է:
Ինչ վերաբերում է Կոնսերվատորիայի Գյումրիի մասնաճյուղին, նախարարը նշեց, որ բոհի ղեկավարի հետ պայմանավորվել են, որ առաջիկա 10 օրերի ընթացքում Գյումրիի մասնաճյուղի հարցը պետք է լուծվի.
«Եթե չլուծվի, ես ավելի լրջորեն կզբաղվեմ այդ հարցով: Ես խնդիրների մեջ այնքան էլ չեմ խորացել, որովհետև դա յուրաքանչյուր բուհի ներքին խնդիրն է, բայց եթե այդ խնդիրները սկսում են բնականոն ուսումնական պրոցեսը խաթարել, նախարարությունը պետք է միջամտի: Որքան հասկանում եմ՝ այդ խնդիրները լուծում չեն ստանում և հաջորդ շաբաթ նորից կայցելեմ Գյումրի»:
Արայիկ Հարությունյանը նկատեց, որ Հայաստանում իրավիճակ է փոխվել և յուրաքանչյուր ոք բարձրացնում է այն խնդիրները, որոնք 25 տարի չի կարողացել բարձրացնել.
«Դրա արդյունքում առաջանում են կոնֆլիկտներ, անհանգիստ իրավիճակներ: Ես, իհարկե, կոչ եմ արել, որ չփորձեն այդ ձևով հարցեր լուծեն, այլ ԿԳՆ-ի միջնորդությամբ, ԿԳՆ-ի հետ համագործակցությամբ լուծեն: Շատ արտառոց վիճակներ չկան, բայց որտեղ տեսնենք նախարարության միջամտության կարիքը կա, դա կլինի»: