«Տասնյակ չսովորող ուսանողներ սկսել են դուրս մնալ ԵՊՀ-ից». Արայիկ Հարությունյան

ՀՀ կրթության և գիտության նախարար Արայիկ Հարությունյանը, «Ազատություն ռադիոկայան»-ի «Ֆեյսբուքյան ասուլիս»-ում անդրադառնալով վատ առաջադիմություն ունեցող ուսանողների բուհերից դուրս չմնալու խնդրին, ասաց.

«ԵՊՀ-ում վերջին մի քանի ամիսներին իրավիճակը փոխվել է, և չսովորելու պատճառով համալսարանից դուրս են մնում տասնյակ ուսանողներ:

Շատ վատ է, որ բուհերի բյուջեների կեսից ավելին ձևավորվում է ուսանողների վարձերից: Սա ազդում է դասապրոցեսի և ընդհանուր որակի վրա: Հաճախ չսովորող, վատ առաջադիմություն ունեցող ուսանողները դուրս չեն մնում բուհերից, քանի որ վճարում են դրա համար: Պետք է խոստովանեմ, որ ԵՊՀ-ում վերջին ամիսներին իրավիճակը փոխվել է: Տասնյակ ուսանողներ դուրս են մնում համալսարանից չսովորելու պատճառով:

Նախարարը հավելեց, որ միջնաժամկետ կտրվածքով սա կարող է դրական արդյունք տալ:

Հարությունյանը խոստացավ հետամուտ լինել բոլոր խնդիրներին և համբերատարության կոչ արեց: Թիմն օր ու գիշեր աշխատում է: Խնդիրները շատ են: «Պարզեցի, որ միջին մասնագիտական կրթություն մատուցող ուսումնական հաստատություններում էլ ավելի մեծ խնդիրներ կան»,-նշեց նախարարը: