Արցախի կրթության ոլորտին հատկացվել էր մոտ 14 մլրդ դրամ. բյուջեի կատարողականի քննարկում

Մայիսի 21-ին տեղի է ունեցել Արցախի Հանրապետության ԱԺ գիտության, կրթության, մշակույթի, երիտասարդության եւ սպորտի հարցերի ու ֆինանսաբյուջետային եւ տնտեսական կառավարման հարցերի մշտական հանձնաժողովների համատեղ նիստը, որը վարում էին հանձնաժողովների նախագահներ Արմեն Սարգսյանը եւ Ռուսլան Իսրայելյանը:

Արցախի Աժ հանրային կապերի վարչության փոխանցմամբ, ներկայացնելով կրթության, գիտության եւ սպորտի բնագավառի 2017թ.-ի տարեկան կատարողականը՝ նախարար Նարինե Աղաբալյանը նշել է, որ հաշվետու տարում ոլորտին հատկացվել է 14մլդ 381,1մլն դրամ, կատարողականը կազմել է 13 մլդ 974,3 մլն դրամ կամ 97%-ը:

Նախարարի խոսքով բյուջեից հատկացված գումարի զգալի մասն ուղղվել է հանրակրթության ոլորտին:

Մշակույթի, երիտասարդության հարցերի նախարարության 2017թ. բյուջեի տարեկան կատարողականի մասին հաշվետվությամբ հանդես է եկել նախարար Սերգեյ Շահվերդյանը: Նախարարի փոխանցմամբ ոլորտին է հատկացվել շուրջ 1մլդ 500 հազ դրամ, կատարողականը՝ 96%:

Պատգամավորները ոլորտի պատասխանատուներին են առաջադրել Հայաստանի եւ արտասահմանյան երկրների բուհերում սովորող Արցախի ուսանողներին աշխատանքով ապահովելու, ավարտական քննությունների, Ստեփանակերտի պետական դրամատիկական թատրոնի՝ շրջաններում հյուրախաղերի կազմակերպման, տոնական օրերին մշակույթի ոլորտում արվող ծախսերի եւ այլ թեմաների վերաբերյալ հարցեր: