Սուրեն Պապիկյանը ներկա է գտնվել ԵՄ համաֆինանսավորմամբ ծրագրի բացման արարողությանը

ՀՀ տարածքային կառավարման և զարգացման նախարար Սուրեն Պապիկյանը Հայաստանում Եվրամիության օրերի շրջանակներում սույն թվականի մայիսի 20-ին ներկա է գտնվել Ամասիա համայնքում Եվրամիության կողմից համաֆինանսավորվող «ԵՄ-ն Շիրակի մարզին. Նոր աշխատատեղեր շնորհիվ բրդի արտադրության» ծրագրի բացման հանդիսավոր արարողությանը։

Միջոցառմանը ներկա են եղել Հայաստանում Եվրոպական միության պատվիրակության ղեկավար, արտակարգ և լիազոր դեսպան Պյոտր Սվիտալսկին, ՀՀ գյուղատնտեսության նախարար Արթուր Խաչատրյանը, Շիրակի մարզպետի պաշտոնակատար Սեյրան Պետրոսյանը, Ամասիա համայնքի ղեկավար Ջեմմա Հարությունյանը, «Մարդը կարիքի մեջ» ՀԿ հայաստանյան գրասենյակի ղեկավար Վարդուհի Դադունցը, ինչպես նաև քաղաքացիական հասարակության և գործարար սեկտորի, գործընկեր կազմակերպությունների ու լրատվամիջոցների մի շարք ներկայացուցիչներ։

Ողջունելով ներկաներին՝ նախարար Սուրեն Պապիկյանը նշել է, որ Տարածքային կառավարման և զարգացման նախարարությունը կարևորում է Հայաստանի տարածքային համաչափ զարգացումը և 2009 թվականից ի վեր շարունակական երկխոսության մեջ է ԵՄ-ի հետ: Համագործակցության նպատակն է ապահովել ծրագրերի և նախագծերի իրականացումը, որոնք վերցված են տարածքային զարգացման առաջնայնությունների շարքից և որոնց կիրառումը կհանգեցնի արդյունավետ և կայուն արդյունքի:

2003 թվականից ի վեր որոշ համընդհանրություններ ունեցող ռազմավարություններ, այդ թվում՝ Աղքատության կրճատման ռազմավարության ծրագիրը (ԱԿՌԾ), դրա իրավահաջորդ Կայուն զարգացման ծրագիրը (ԿԶԾ) և վերջին՝ Հայաստանի զարգացման ծրագիրը (ՀԶԾ), նախապատվությունը տալիս են աշխատատեղերի ստեղծմանն ու տնտեսական զարգացմանը:

«Ինչպես գիտեք, 2014 թվականի դեկտեմբերի 11-ին ՀՀ կառավարությունը հավանություն է տվել «Աջակցություն Հայաստանի տարածքային զարգացմանը» ֆինանսավորման համաձայնագրին: Ծրագրի ընդհանուր գնահատված արժեքն է 11 750 000 եվրո, որից 10 000 000 եվրոն ԵՄ-ի ներդրման ընդհանուր գումարն է, իսկ 1 750 000 եվրոն՝ ՀՀ կառավարության կողմից համաֆինանսավորվող գումարն է»,- ասել է նախարարը:

Մանրամասն ներկայացնելով ծրագրի 7 բաղադրիչները՝ Սուրեն Պապիկյանն արձանագրել է, որ ծրագիրն ունի լայն աշխարհագրություն, և ծրագրի իրականացման ընթացքում ստեղծվում են նոր աշխատատեղեր: «Ծրագրի հիմնական շահառուներն են խոշորացված համայնքները: Ծրագրի ընթացքում առաջացած տնտեսումների հաշվին հնարավոր է դարձել այնտեղ ներառել 8-րդ բաղադրիչը՝ «ԵՄ-ն Շիրակի մարզին։ Նոր աշխատատեղեր շնորհիվ բրդի արտադրության» ծրագիրը, որն իրականացվում է չեխական «Մարդը կարիքի մեջ» կազմակերպության հայաստանյան ներկայացուցչության (ՄԿՄ), Ամասիայի համայնքապետարանի, Շիրակի առևտրաարդյունաբերական պալատի և ՎԻՆՆԵԹ Հայաստանի հետ համատեղ»,- եզրափակել է նախարարը:

Բացման պաշտոնական մասին հետևել է ծրագրի ներկայացումը՝ բրդի արժեշղթայի բաղադրիչների ինտերակտիվ ցուցադրություն միջոցով։

Հիշեցնենք, որ ծրագրի նպատակն է աջակցել Շիրակի մարզում բրդի արժեշղթայի ձևավորմանը և զարգացմանը՝ գործող և նորաստեղծ ձեռնարկությունների մրցունակության բարձրացման և նոր աշխատատեղերի ստեղծման միջոցով: Ծրագրի շրջանակներում Ամասիա համայնքում կհիմնադրվի բրդի վերամշակման գործարան՝ 23 նոր աշխատատեղի ստեղծման հնարավորությամբ։ Նոր աշխատատեղեր ստեղծելու, տնտեսական զարգացմանը նպաստելու համար ծրագիրը կֆինանսավորի ՓՄՁ-ների կողմից առաջարկված 14 լավագույն բիզնես առաջարկները՝ ապահովելով նվազագույնը 44 նոր աշխատատեղ:

Ծրագրի ընթացքում Զբաղվածության կենտրոններում հաշվառված շուրջ 150 աշխատանք փնտրողներ դասընթացների շնորհիվ կզարգացնեն իրենց հմտությունները՝ բարձրացնելով իրենց մրցունակությունն աշխատաշուկայում։ Եվրամիության կողմից համաֆինանսավորվող այս ծրագիրը կնպաստի նաև տարածաշրջանում ոչխարաբուծության զարգացմանը՝ կայուն եկամուտ ապահովելով տեղի ֆերմերների համար։