ՍԾՏՀ նախագահի ընտրության անցկացման համար 3 վայր կա՝ Երևան, Բաքու, Սոֆիա. հայ պատգամավորները հորդորում են միջոցառումն անցկացնել Սոֆիայում
Սևծովյան տնտեսական համագործակցության կազմակերպության 25 ամյակի առթիվ ընդունվել է հայտարարություն: Հայաստանն այս կազմակերպությունում ներկայացնող պատվիրակության ղեկավար, ՀՀԿ-ական պատգամավոր Գագիկ Մինասյանն այսօր լրագրողներին ասաց, որ փաստաթուղթը մշակվել է Ստամբուլում:
«Հռչակագիրն ուղարկվել էր անդամ-պետությունների ներկայացուցիչներին, ովքեր պետք է առաջարկներ ներկայացվեին: Կեսից ավելի պետություններ ներկայացրել էին առաջարկները: 2 հակադիր տեսակետներ կային, որոնցից մեկը ներկայացրել էինք մենք, մյուսը՝ Ուկրաինան: Մենք գտնում էինք, որ վեհաժողովը պետք է մնա տնտեսական, զերծ՝ քաղաքական խնդիրներից: Ճիշտ հակառակ դիրքորոշումն էր ներկայացնել Ուկրաինան, որը գտնում էր, որ 25-ամյակի փաստաթղթում պետք է լինի պետության սահմանների անխախտելիության ու սահմանների ամբողջականության մասին կետ»,- մանրամասնեց Գագիկ Մինասյանը:
Պատգամավորն ասաց, որ վեհաժողովի պատվիրակությունները չեն ընդունել ոչ Հայաստանի, ոչ էլ Ուկրաինայի պատվիրակությունների առաջարկները: Փոխարենը, նրա խոսքով, ընդունվել է վրացական կողմի առաջարկը, որն ընդունելի է Հայաստանի համար:
Նա ասաց, որ առաջարկ է եղել անդրադառնալ արաբաիսրայելական հակամարտությանը, բայց ՍԾՏՀ-ն ընդգծված տնտեսական ուղղվածության է, ռեգիոնալ է և ռեգիոնից դուրս գտնվող արաբաիսրայելական կոնֆլիկտը չպետք է ներառվի:
«Կառույցն անհարկի կքաղաքականացվեր»,- նշեց նա:
Գագիկ Մինասյանը տեղեկացրեց նաև, որ վեհաժողովի համար առաջիկայում կա ևս երկու կարևոր հարց՝ մեկը գլխավոր քարտուղարի ընտրությունն է, մյուսը՝գլխավոր քարտուղարի ընտրության ժամկետների ու տեղի որոշումն է:
«Անցկացման վայրերը կարող են լինել Երևանը, Բաքուն, Սոֆիան: Մենք աշխատանքներ ենք տանում, որ բյուրոն չընտրի Բաքուն որպես վեհաժողովի նախագահի ընտրության վայր: Անցած 15 տարիներին Բաքուն մեր կառույցի շրջանակներում որևէ միջոցառման չի մասնակցել: Ադրբեջանը պետք է մեր պատգամավորներին տա անվտանգության երաշխիքներ: Նրանք երբեք չեն տվել նման երաշխիքներ, ասել են, որ բոլոր պատվիրակություններին են տալիս հավասար իրավունքներ: Սա քաղաքական առճակատում է: Եթե այդ միջոցառումն անցնի Բաքվում՝ մենք կզրկվենք մասնակցելուց: Եվ որպեսզի չլինի կողմնապահություն, մենք առաջարկում ենք, անցկացնել Երևանում»,- ասաց պատգամավորը:
Նրա խոսքով՝ լուրջ աշխատանքներ են, կատարվել նաև գլխավոր քարտուղարի թեկնածուի փնտրտուքի վերաբերյալ:
Հայաստանի պատվիրակության մյուս անդամ, «Ծառուկյան» խմբակցության պատգամավոր Վահե Էնֆիաջյանն էլ նշեց, որ ՍԾՏՀ-ն տարբերվում է խորհրդարանական այլ կազմակերպություններից, որովհետև կենտրոնը Թուրքիայում է՝ Ստամբուլ քաղաքում, իսկ գլխավոր քարտուղարն ադրբեջանցի է: Առաջիկա նոր ընտրություններն, այս տեսանկյունից, նրա խոսքով, տրամաբանական է, որ կոնֆլիկտներից խուսափելու համար անցկացվեն Սոֆիայում, ոչ թե Երևանում կամ Բաքվում: