Հնարավորություն է ստեղծվել կայուն և կանխատեսելի տնտեսություն ձևավորելու համար. Արցախի պետնախարար
Արցախի Հանրապետության պետական նախարար Արայիկ Հարությունյանը մայիսի 15-ին ընդունել է Հայաստանի Հանրապետության արտաքին գործերի նախարարության դիվանագիտական դպրոցի ունկնդիրներին՝տնօրեն, դեսպան Վահե Գաբրիելյանի գլխավորությամբ:
Ա. Հարությունյանը ապագա դիվանագետներին ներկայացրել է վերջին տարիներին Արցախի տնտեսության տարբեր ուղղություններում արձանագրված հիմնական հաջողություններն ու ցուցանիշները: Պետնախարարի խոսքով՝ հետեւողական քաղաքականության շնորհիվ ունեցած ձեռքբերումները նոր հնարավորություններ են ստեղծել կայուն եւ կանխատեսելի տնտեսության ձեւավորման համար, ինչն էլ իր դրական ազդեցությունն է թողելինչպես սոցիալական լարվածության թուլացման, այնպես էլ ժողովրդագրական ցուցանիշների բարելավման վրա:
«Մենք շատ լավ հասկանում ենք, որ տնտեսական, քաղաքական եւ անվտանգային առումներով ուժեղ եւ պաշտպանված Արցախի գոյությունը բանակցային գործընթացում լուրջ առավելություն է տալու հայկական կողմին: Այս իմաստով մենք մեծ ջանքեր ենք գործադրում, եւ ուրախությամբ պետք է արձանագրեմ, որ այս հարցում ունենք Հայաստանի Հանրապետության եւ Սփյուռքի անվերապահ աջակցությունը»,- ընդգծել է Ա. Հարությունյանը:
Հանդիպման ընթացքում պետական նախարարը պատասխանել է նաեւ դիվանագիտական դպրոցի ունկնդիրներին հետաքրքրող տարաբնույթ հարցերի:
ՀՀ արտաքին գործերի նախարարության դիվանագիտական դպրոցի տնօրեն Վահե Գաբրիելյանը շնորհակալություն է հայտնել Ա. Հարությունյանին ջերմ ընդունելության եւ դպրոցի ունկնդիրների հարցերին հանգամանալից պատասխանելու համար, եւ նշել, որ այս այցի ընթացքում մեծ տեղ են հատկացրել տնտեսական նախագծերին ծանոթանալուն:
Հանդիպմանը մասնակցել է նաեւ ԱՀ ԱԳ նախարարի տեղակալ Արմինե Ալեքսանյանը