Հայ-ռուսական հարաբերությունները լինելու են շատ ավելի եղբայրական. վարչապետ Փաշինյանի գլխավորած պատվիրակությունը Սոչիում է
ՀՀ վարչապետ Նիկոլ Փաշինյանի գլխավորած պատվիրակությունը ժամանել է Սոչի՝ մասնակցելու Եվրասիական տնտեսական բարձրագույն խորհրդի հերթական նիստին: Սոչիի միջազգային օդանավակայանում ՀՀ վարչապետին դիմավորել է Սոչիի քաղաքապետ Անատոլի Պախոմովը:
Ինչպես հաղորդում է «Արմենպրես»-ի թղթակիցը, Նիկոլ Փաշինյանի աշխատանքային այցի առաջին կանգառը Ադլերի Սբ Սարգիս հայկական եկեղեցին էր, որտեղ ՀՀ վարչապետին դիմավորել են Հայ առաքելական եկեղեցու Ռուսաստանի հարավային հայոց թեմի առաջնորդ Մովսես եպիսկոպոս Մովսիսյանը, Սբ Սարգիս եկեղեցու հոգևոր հայրերը, հայ համայնքի ներկայացուցիչներ:
Եկեղեցում կատարվել է բարիգալստյան աղոթք և մոմավառություն: ՀՀ վարչապետը ծաղիկներ է զետեղել եկեղեցու բակում գտնվող խաչքարերի մոտ: Փաշինյանը ելույթ է ունեցել նաև հայկական համայնքի ներկացուցիչների առջև, որոնք ջերմությամբ են ընդունել ՀՀ նորընտիր վարչապետին:
Նա նշել է, որ հայ-ռուսական եղբայրական հարաբերությունները պետք է ավելի ամրապնդվեն: Փաշինյանը երախտիքի խոսք է հղել Ռուսաստանին, որ լավ է ընդունել հայկական համայնքին ու պայմաններ ստեղծել նորմալ կենսագործունեության համար, սակայն ընդգծել է, որ բոլորի նպատակը պետք է լինի հայրենադարձությունը:
«Բայց ես ուզում եմ նաև ասել, որ մեր նպատակը մեծ հայրենադարձությունն է՝ հայության մարդկային, ֆինանսական, տնտեսական, հոգևոր, գիտական ներուժը կամ դրա զգալի մասը Հայաստանի Հանրապետությունում կենտրոնացանելը և նրա անվտանգությունն ու բնականոն զարգացումն ապահովելը: Սոչիի բոլոր հայերին, գործարարներին, Ռուսաստանի բոլոր հայ և ռուս գործարարներին կոչ եմ անում գալ Հայաստան և անել ներդրումներ, ստեղծել աշխատատեղեր, որովհետև սա արդեն նոր Հայաստան է, որտեղ յուրաքանչյուր ներդրում պաշտպանված է լինելու»,-վստահեցրել է վարչապետ Փաշինյանը:
Նա նկատել է, որ ներկայում Հայաստանի քաղաքացու, երկրի հեղինակությունը բարձր է քան երբևէ:
«Ստեղծված են բոլոր պայմանները, որ մենք ապրենք և ստեղծագործենք հայրենիքում: Անկասկած է նաև, որ հայ-ռուսական հարաբերությունները լինելու են շատ ավելի եղբայրական: Եվ ես համոզված եմ, որ վաղվա մեր հանդիպումները կլինեն արդյունավետ: Եվ ուրեմն՝ Աստված պահպանի Ռուսաստանի Դաշնությունը, Աստված պահպանի Հայաստանի Հանրապետությունը, կեցցե հայ-ռուսական բարեկամությունը»,-եզրափակել է խոսքը Փաշինյանը:
ՀՀ վարչապետի աշխատանքային այցի ընթացքում տեղի է ունենալու Նիկոլ Փաշինյանի և ՌԴ նախագահ Վլադիմիր Պուտինի հանդիպումը: Նախատեսված են հանրապետության վարչապետի այլ երկկողմ հանդիպումներ: