Հայաստանի խնդիրները մի օրում չեն լուծվի, սակայն Հայաստանը կատարյալ վայր կարող է դառնալ ԵՄ-ի, ԵԱՏՄ-ի և Իրանի միջև. Ռուբեն Վարդանյան
Գործարար և բարերար Ռուբեն Վարդանյանը բրիտանական Financial Times ամսագրում հրապարակված հոդվածում ներկայացրել է իր տեսլականը Հայաստանում տեղի ունեցող փոփոխությունների և ակնկալիքների վերաբերյալ:
«Վերջին մի քանի շաբաթները միջազգային աննախադեպ ուշադրություն են հրավիրել Հայաստանի վրա: Հիասթափված անարդար հասարակությունից և անարդյունավետ տնտեսական իրավիճակից՝ տասնյակ հազարավոր քաղաքացիներ փողոց էին դուրս եկել խաղաղ ցույցի՝ հանուն ավելի լավ և առավել ժողովրդավարական ապագայի: Հայաստանի համար նոր էջ է բացվում՝ լի հնարավորություններով և անորոշությամբ: Հայաստանը կարող է փարոս դառնալ այլ ժողովուրդների համար, եթե հաջողությամբ վերափոխի կառավարությունը», - գրում է գործարարը՝ ընդգծելով, որ հեղափոխությունը ոչ թե մեկ մարդու, այլ ողջ ժողովրդի և հատկապես՝ երիտասարդության հաղթանակն է:
«Նրանք, ովքեր դուրս էին եկել փողոց, պետք է իրատես լինեն: Հայաստանի խնդիրները մի օրում չեն կարգավորվի: Ոչ ոք չպետք է հավատա նրան, ով կխոստանա արագորեն միլիարդ դոլարների ներդրումներ գրավել: Փոխարենը մենք պետք է մեծացնենք մեր մրցունակությունը որպես երկիր՝ համաշխարհային տնտեսության շրջանում ծաղկելու համար»,- շեշտել է Վարդանյանը:
Նա ընդգծել է հայ ժողովրդի հնարագիտությունն ու նորարարությունը՝ նշելով, որ Հայաստանը ունակ է կատարյալ վայր դառնալ ԵՄ-ի, ԵԱՏՄ-ի և Իրանի միջև տարբեր երկրներում հայ համայնքների ներկայացուցիչների միջև համագործակցության փորձի շնորհիվ: Նրա խոսքով՝ Նիկոլ Փաշինյանը պետք է օգտագործի ողջ աշխարհի հայերի խանդավառությունը Հայաստանի զարգացման աճի արագացման համար:
Հոդվածը եզրափակելով՝ Ռուբեն Վարդանյանը հիշեցրել է, որ հունիսին Երևանում կկայանա «Ավրորա» ամենամյա մրցանակաբաշխությունը, որը համընկնում է Հայաստանի քաղաքացիների և ողջ աշխարհի հայության համար նոր ժամանակաշրջանի մեկնարկի հետ: