Զոլաքար գյուղում բացվեց և օծվեց Արցախյան ազատամարտի զոհերի հիշատակի խաչքարը

Գեղարքունիքի մարզի Զոլաքար գյուղում Մայիսյան հաղթանակների տոնի օրը նշանավորվել է Արցախյան ազատամարտի զոհերի հիշատակին նվիրված խաչքար-հուշարձանի բացմամբ:

Ինչպես «Արմենպրես»-ին տեղեկացրեց Զոլաքարի թիվ 2 միջնակարգ դպրոցի տնօրեն Սամվել Մելիքյանը, հուշարձանը տեղադրվել է Հայրենական մեծ պատերազմում զոհվածների հուշարձանի հարևանությամբ: Հուշաքարի բացման հանդիսավոր արարողությանը մասնակցել են Զոլաքարի գյուղապետ Արման Ղազարյանը, գյուղապետարանի աշխատակիցներ, գյուղի երկու միջնակարգ դպրոցների մանկավարժները և աշակերտները, Արցախյան գոյամարտի վետերաններ, 2016 թվականի Ապրիլյան հերոսամարտերում զոհվածների ընտանիքների անդամներ, հյուրեր, անհատ քաղաքացիներ:

Հուշարձան-խաչքարը պատրաստվել և տեղադրվել է արտերկրում բնակվող մի խումբ զոլաքարցի գործարար-բարերների միջոցներով: «Զոլաքարն Արցախյան ազատամարտի շատ մասնակիցներ է տվել,որոնցից երկուսն իրենց անունը փառքով են պսակել՝ Ալվարդ վարդանյանը, ում անունը հպարտորեն կրում է մեր դպրոցը, և Տիգրան Աբրահամյանը, ում անունը կրում է Մարտունի քաղաքի ավագ դպրոցը:

Գագիկ Մելքոնյանը և Դավիթ Հայրապետյանը հերոսի մահով ընկան Ապրիլյան հերոսամարտերում: Ամեն տարվա մայիսի 9-ին մեր գյուղն իր հարգանքի տուրքը կմատուցի հավերժացած մեր հերոսների, բոլոր այն հայորդիների սուրբ հիշատակի առաջ, ովքեր կյանի գնով մեր հողին բերեցին հաղթանակ եւ խաղաղություն»,-«Արմենպրես»-ի հետ զրույցում նշեց Սամվել Մելիքյանը: