«Շարժումը չի կարելի անձնական շահերի համար շահարկել». ՇՊՀ ռեկտորին չթողեցին ելույթ ունենալ
Շիրակի պետական համալսարանում թալան է տեղի ունեցել՝ սկսած աստղաբաշխական աշխատավարձերից, վերջացրած անօրինական մեթոդներով լիցենզիա ստանալուց եւ մարդկանց խաբելուց: Այս մասին, Գյումրիում բուհի դիմաց բողոքի ակցիայի ժամանակ իր ելույթում նշեց որոշ ժամանակ առաջ ռեկտոր Սահակ Մինասյանի որոշմամբ համալսարանից հեռացված Գագիկ Համբարյանը:
Նրա խոսքով, ռեկտոր Սահակ Մինասյանը լիցենզիաներն ստացել է խաբելով, որովհետեւ համապատասխան մասնագետներ ինքը չունի: ԿԳՆ-ի կողմից 2017- նոյեմբերին հրապարակված ակտում ամեն բան նշված է: Ի դեպ, ԿԳ նախկին նախարար Լեւոն Մկրտչյանը փաստագրված է համարում մեր բոլոր փաստարկները: Քաղաքագիտության բաժնում քանի՞ պաշտպանած դասախոս ունեն՝ զրո, սոցիոլոգիայի բաժնում քանի՞ հիմնական պաշտպանած դասախոս ունեն՝ զրո: Իրավագիտության բաժնում ընդամենը ապրիլի սկզբին են մեկ պաշտպանած դասախոս գտել, որ երեքը լրացվի, այն էլ ոչ հիմնական դասախոսներ են:
Բուհի տանիքի համար ծախսվել է 100 մլն դրամ: Դուք որտեղ եք տեսել, որ դահլիճի վրա ծախսվի 250 հազար դոլար: Ինչ վերաբերում է գրադարանին, ապա գրադարանի աշխատողները կարող են ասել, թե ինչ քանակությամբ գրքեր են դուրս գրվել ու թափվել»,-հայտարարեց Համբարյանը:
Նա ընդգծեց, որ բուհի 2017 թվականի հաշվետվությունից պարզվում է, որ Սահակ Մինասյանն իր դիզելային գեներատորը բուհի վրա վաճառել է 14 մլն դրամով. «Պարզվում է, որ բուհի հաշվին ֆուտբոլային թիմ է պահում, որի միայն ճանապարհային ծախսերը 2,5 մլն դրամ է, բայց ինքը ուսանողներին 300,000 դրամ չտվեց, որ մասնակցեն Արցախում կայացած գիտաժողովին: Մեկ տարվա մեջ Սահակ Մինասյանի գործունեության հետեւանքով բուհն պատճառվել է 242 մլն դրամի վնաս»: Գագիկ Համբարյանը Սահակ Մինասյանին անվանեց գող, ավազակ, թալանչի, վաստակավոր կաշառակեր եւ կոչ արեց բոլոր դասախոսներին ու ուսանողներին բոյկոտել բուհի աշխատանքները եւ միանալ բողոքի ակցիային:
Որոշ ժամանակ անց Սահակ Մինասյանն իջավ ցուցարարների մոտ եւ փորձեց ելույթ ունենալ. «Արժեւորում եմ ցանկացած համազգային շարժում, բայց նաեւ կողմնակից չեմ, որ համազգային շարժումը կարելի է անձնական նեղ շահերի համար շահարկել»,-ասաց նա, սակայն նրա խոսքն անընդհատ ընդհատում էին՝ բացականչելով. «ամոթ», «հեռացիր», «կաշառակեր» վանկարկումներով: