«Արդյոք դուք էլ հանցագործ չեք, որ աջակցել եք տնօրենին». Քաղաքապետարանի պաշտոնյան՝ թիվ 11 դպրոցի ուսուցիչներին

Ցավում եմ, որ աշակերտական ու մանկավարժական կազմը չի ուզում աշխատել տնօրենի հետ. բայց արդյոք դուք էլ հանցագործ չեք, որ աջակցել եք տնօրենին: Այս մասին, այսօր՝ մայիսի 5-ին, այդ դպրոցում տեղի ունեցած ժողովի ժամանակ նշել է Երևանի քաղաքապետարանի աշխատակազմի հանրակրթության վարչության պետ Աննա Ստեփանյանը:

«Այո, եթե մանկավարժը չսիրված է իր աշակերտի կողմից, նա չպետք է դասարան մտնի: Կարծում եմ, որ ճիշտ էր հրաժարական տալը և այս դպրոցում չաշխատելը: Ցավալի է, որ այսօր դուք կանգնած եք մի փաստի առաջ: Ես երեկվանից անընդհատ ինձ հարց եմ տալիս և պատասխան չեմ գտնում․ ինչո՞ւ էին լռում մանկավարժները, երբ իրենց իրավունքներն այս տարիների ընթացքում ոտնահարվում էին: Հայտարարություն էիք տարածում հանցագործության մասին: Իսկ արդյոք դուք էլ չե՞ք հանցագործ այդ նույն պարագայում, որ աջակցել եք:

Այո, Ռուզան Ազիզյանը կգնա, ձեր հետագա գործունեության մեջ ինչպե՞ս եք պայքարելու ձեր իրավունքների համար: Մարդիկ, որոնք մինչ այժմ չեն պայքարել, վաղը ընդվզելու են յուրաքանչյուր խնդրի դեմ այսպե՞ս: Դա պետք է անել ժամանակին և տեղին»,-հայտարարեց Աննա Ստեփանյանը՝ հավելելով. «Եթե մինչ այսօր մանկավարժը չէր պաշտպանում իր շահերը և այսօր որոշեց պաշտպանել, հուսամ վաղվանից պաշտպանելու է իր շահերը»:

Նա կոչ արեց ծնողներին ընտանիքներում զրուցել երեխաների հետ. «Հիշեք, որ ձեր չսիրած բանի կամ անձի դեմ ընդվզող երեխան վաղն ընդվզելու է նաև ձեր դեմ: Կարողացեք այնպես անել, որ երկուշաբթի առավոտյան 8.30-ին նրանք լինեն դպրոցում, դասերը սկսեք: Երեխաները բակում են, երեխաներին վերցրեք, գնացեք տուն»:

Մանկավարժներից մեկն էլ հակադարձց. «Դուք հիմա քննադատեցիք, ասացիք՝ փոքրոգի եք եղել, չեք ընդվզել: Քանի դեռ շարունակելու եք խոսել այդ տոնով, հրահանգիչի նման, մեր երկխոսությունը չի ստացվելու: Միտ էլ բողոքներ եղել են, այստեղ մարդիկ, մանկավարժները հայտարարեցին, որ բողոքել են, այդ թվում քաղաքապետարան: Այդ ինչպե՞ս է պատահել, որ այդ բողոքները ձեզ չեն հասել: Նաև ձեր ստեղծած բյուրոկրատական համակարգը թույլ չի տվել, որ բողոքները ձեզ հասնեն»:

Նշենք, որ այսօր՝ մայիսի 5-ին, դպրոցի տնօրեն Ռուզան Ազիզյանը հրաժարականի դիմում է ներկայացրել Երևանի քաղաքապետին:

Հիշեցնենք, որ երեկ դպրոցի բակում հավաքվել էին դպրոցի աշակերտնեը և ծնողները, նրանք պահանջում էին տնօրեն Ռուզաննա Ազիզյանի հրաժարականը: Նրանց խոսքով տնօրենը շարժման օրերին աշակերտներին թույլ չի տվել մասնակցել բողոքի ակցիաներին, իսկ ֆիզկուլտուրայի ուսուցչին, որը երեխաների համար բացել էր դուռը, ցանկացել է աշխատանքից ազատել:

Երեկվա ակցիային մասնակցող «Իրազեկ քաղաքացի» ՀԿ ղեկավար Դանիել Իոանիսյանն էլ մեզ հետ զրույցում նշեց, որ մի քանի ժամվա ընթացքում կոռուպցիոն սխեմա բացահայտվեց տնօրենի հետ կապված և իրենք նյութեր են հավաքելու, որպեսզի ներկայացնեն ՀՀ գլխավոր դատախազություն:

Նշենք, որ Երևանի ավագանու «Ելք» խմբակցության անդամները նախօրեին դիմում են ներկայացրել քաղաքապետ Տարոն Մարգարյանին` տնօրենի հետ աշխատանքային պայմանագիրը լուծարելու պահանջով:

Նշենք, որ Մոնթե Մելքոնյանի անվան թիվ 11 դպրոցի տնօրեն Ռուզաննա Ազիզյանը ՀՀ պաշտոնաթող նախագահ Սերժ Սարգսյանի համակուրսեցին է: