Մենք քաղաքական վենդետաներով չենք զբաղվելու, բայց եթե նրանցից որևէ մեկը փորձի օրենք խախտել, կպատժվեն օրենքի ամբողջ խստությամբ. Ա Սիմոնյան
Հանրապետության հրապարակում մեկնարկած ԱԺ «Ելք» խմբակցության ղեկավար, ընդդիմադիր գործիչ Նիկոլ Փաշինյանի նախաձեռնած հանրահավաքին առաջինը ելույթ ունեցավ ակտիվիստ Արեն Մկրտչյանը:
Նա հայտարարեց, որ կարողացել են բաց ձեռքերով հասնել հաղթանակի և իրենք կառուցելու են իրենց երկիրը: Նրա խոսքով՝ վերջին տասը տարում քայլելով Երևանի փողոցներում, մարզերում՝ ժողովրդի դեմքին տեսել է տխրություն, հուսահատություն:
«Հաղթո՛ղ ժողովուրդ, դու ժպիտ ես բերել Հայաստանին»,- ասաց նա:
«Քաղաքացիական պայմանագիր» կուսակցության անդամ, Երևանի ավագանու «Ելք» խմբակցության անդամ Էդուարդ Աղաջանյանն իր ելույթում նշեց հետևյալը.
«Վերջին շրջանում ականատեսն ենք լինում մի աննախադեպ տեղեկատվական պատերազմի, հիմնականում սոցիալական ցանցերում, որը հայտարարվել է մեզ մերձհանրապետական ֆեյքերի կողմից՝ «թողեք ես ընտրեմ» hashtag-ով։ Որևէ մեկը ձեր ընտրության իրավունքը չի խաթարելու: Հակառակը՝ սա վերջին 20 տարիների ընթացքում այն հնարավորությունն է, որ բոլորը՝ անկախ կուսակցական պատկանելությունից, հնարավորություն են ունենալու կատարել իրոք ազատ և անկախ ընտրություն
Ելույթ ունեցավ նաև Երևանի ավագանու «Ելք» խմբակցության անդամ Ալեն Սիմոնյանը: Նա նկատեց, որ այս օրերին հաճախ խոսվում է այն մասին, որ այս տարիների ընթացքում շատ մարդիկ վատ բաներ են արել Հայաստանում:
«Ես ցանկանում են նորից հիշեցնել, որ մենք քաղաքական վենդետաներով չենք զբաղվելու: Բայց ես ուզում եմ, որ նրանք բոլորը հիշեն, որ եթե նրանցից որևէ մեկը փորձի օրենք խախտել, կպատժվեն օրենքի ամբողջ խստությամբ»,- ասաց նա: