Մանվելը ճիշտ կլիներ, երբ լիներ ՀՀԿ-ի վլաստը. Ճոյտը մանրամասներ է պատմում ԵԿՄ փոխնախագահի սպանությունից
Նախկին ՀՀԿ-ական պատգամավոր Հակոբ Հակոբյանը (Ճոյտը) պնդում է, որ ինքը որեւէ առնչություն չունի ԵԿՄ Էջմիածնի կառույցի փոխնախագահ Նվեր Հովհաննիսյանի դանակահարելով սպանելու դեպքի հետ: News.am-ի թղթակցին Հակոբ Հակոբյանն ասաց, որ նման տեղեկություններ տարածում են ԵԿՄ նախագահ Մանվել Գրիգորյանը և նրա որդին` Էջմիածնի քաղաքապետ Կարեն Գրիգորյանը:
«Ես հենց այնպես չեմ ասում, կամ արդարանում, որ այդ միջադեպով որևէ առնչություն չունեմ, այնտեղ կամերաներ են տեղադրված և բոլոր տեսագրությունները կան, կարող են վերցնել նայել և իմ ասածները ճշտել»,- ասաց նա:
Հակոբ Հակոբյանը դեպքից մանրամասներ պատմեց` նշելով, որ միջադեպի ժամանակ ինքը և Կարեն Գրիգորյանը միմյանց հետ զրուցելիս են եղել և երկուսն էլ չեն տեսել` ինչ է կատարվել:
«Դեպքը տեղի է ունեցել ապրիլի 23-ին` Սերժ Սարգսյանի հրաժարականի օրը, երբ ողջ քաղաքը նշում էր այդ իրադարձությունը: Ես իրենց միացել եմ ժամը 18:30-ին, գնացել եմ իմ 70-ամյա ընկերոջ հետ: Երբ ես իջա այնտեղ, կլինեին մոտ 400 հոգի և մեքենաներ, որ հրապարակի շուրջը պտտվում էին: Մանվելի մարդիկ շլագբաումներով փակել էին, որ մարդիկ այդ կողմը չգնային: Ես մարդկանց ասեցի, դե ձեր ձեռքով դրանք վերցրեք, դրեք մի կողմ, իրենք էլ հանեցին մի 15 մետր այն կողմ դրեցին և շարունակեցին ուրախանալ:
Մինչ այդ Մանվելի երկրապահի տղաները գալիս են, մի քանի անգամ սադրում են, փորձում են բնակիչներին հանել այդ տարածքից: Հետո երկրապահի կողմից մի 40 հոգի եկան, այդ ժամանակ «Ելք» դաշինքից մի մարդ ելույթ էր ունենում, ասում էր, որ իրեն առավոտյան իր տղայի մոտ ծեծի են ենթարկել և չեն թողել, որ գնա միտինգի: Երբ երկրապահի տղաները եկան, կանգնեցին, այդ մարդը ձեռքը ուղղեց երկրապահի տղաների ուղղությամբ և ասաց, որ, այ, էս սպարտիվկով տղեն էր, որ ինձ ծեծեց, ու հայհոյեց էդ սպարտիվկով տղային: Կարեն Գրիգորյաննն էլ ասեց` էս ինչ սարքեցիր, ես էլ ասեցի` ստեղ սարքելու բան չկա, ժողովորդը տոնում է իր հաղթանակը, որ վերջապես Էջմիածինը պատկանում է էջմիածնեցիներին: Մի քիչ խոսեցինք ու գնացինք, գնալուց մի 40 րոպե հետո ասեցին, որ տենց դեպք է եղել»,-ասաց Հակոբ Հակոբյանը:
Հակոբ Հակոբյանը կարծում է, որ գործը շատ հեշտությամբ կբացահայտվի տեսագրություններով, ինչը, սակայն, քաղաքապետի և իր կողմնակիցների շահերից չի բխում:
«Մանվելը էն ժամանակ ճիշտ կլիներ, երբ որ լիներ հանրապետական կուսակցության վլաստը և ցուցում լիներ համապատասխան բարձր տեղից, որ ավելի լավ է քննությունը էս ուղղությամբ տանել: Բայց հիմա ամեն ինչ փոխվել է, ոչ մեկ իր գլխից ձեռ չի քաշել կեղծ քննություն տանի: Ես իրենց ալան-թալանի մասին միշտ խոսել եմ, և հիմա իրենց համար իմ անձը արդեն վտանգավորություն է ներկայացնում:»,-հավելեց Հակոբ Հակոբյանը:
Հիշեցնենք, որ ավելի վաղ հայտնի էր դարձել, որ ապրիլի 23-ին, ժամը 18.55-ին կրծքավանդակի աջ կեսի կտրած-ծակած վերք նախնական ախտորոշմամբ Էջմիածնի հիվանդանոց է տեղափոխվել 46-ամյա Նվեր Հովհաննիսյանը, ով երեք ժամ անց մահացել է վիրահատության ժամանակ:
Մանվել Գրիգորյանը հայտարարել էր, որ դրա հեղինակը ԱԺ նախկին պատգամավոր Հակոբ Հակոբյանի մարդիկ:
Դեպքի առթիվ հարուցվել է քրեական գործ: