Թբիլիսիում Հայոց ցեղասպանության 103-րդ տարելիցի միջոցառմանը վրացերեն գրքույկ է ներկայացվել

Վրաստանում ՀՀ դեսպանության կազմակերպմամբ ապրիլի 23-ին Թբիլիսիում տեղի է ունեցել Հայոց ցեղասպանության 103-րդ տարելիցին նվիրված միջոցառում, որի շրջանակներում տեղի է ունեցել Վրաստանում ՀՀ դեսպանության կողմից հրատարակած «Փաստեր Հայոց ցեղասպանության մասին» վրացերեն գրքույկի շնորհանդեսը։

Միջոցառմանը ներկա էին Վրաստանի խորհրդարանի պատգամավորներ ու այլ պաշտոնյաներ, դեսպաններ ու Վրաստանում հավատարմագրված դիվանագիտական կորպուսի անդամներ, մտավորականներ, վիրահայ համայնքի ներկայացուցիչներ։ Այս մասին տեղեկացրին Վրաստանում ՀՀ դեսպանության մամուլի ծառայությունից։

Հաղորդագրության մեջ նշված է. «Միջոցառմանը բացման խոսքով հանդես եկավ Վրաստանում ՀՀ դեսպան Ռուբեն Սադոյանը, ով իր ելույթում, մասնավորապես նշեց, որ Հայ ժողովրդի արևմտյան հատվածը, որ հազարամյակներով ապրել էր իր բնօրրանում տեղահանվեց և բնաջնջվեց համաձայն պետականորեն մշակված ծրագրի։ Դեսպանն ընդգծեց, որ հայ ժողովուրդը և առաջադեմ միջազգային հանրությունը սպասում են, որ Թուրքիան իր մեջ քաջություն կգտնի առերեսվելու սեփական պատմությանը և ճանաչելու Հայոց ցեղասպանությունը։

Անդրադառնալով ցեղասպանությունների կանխարգելմանը՝ դեսպան Սադոյանը նշեց, որ հայ ժողովուրդը, վերապրելով ցեղասպանությունն ու բնաջնջման վտանգը, այսօր նոր ցեղասպանությունների և մարդկության դեմ հանցագործությունների կանխարգելման պայքարում դարձել է առաջամարտիկ:

Միջոցառման ընթացքում ցուցադրվեցին կարճամետրաժ փաստավավերագրական ֆիլմեր։

Այնուհետև, ներկաներն ունկնդրեցին Կոմիտասի անվան ազգային լարային քառյակի կատարումները։

Միջոցառման շրջանակներում տեղի ունեցավ նաև Վրաստանում ՀՀ դեսպանության կողմից հրատարակած «Փաստեր Հայոց ցեղասպանության մասին» վրացալեզու գրքույկի շնորհանդեսը»։