Գեղարքունիքի մարզում հարգեցին Հայոց ցեղասպանության սրբադասված զոհերի հիշատակը
Առավոտյան ժամերից Գեղարքունիքի մարզի քաղաքային եւ գյուղական համայնքներում հազարավոր մարդիկ ծաղկեդրմամբ, մոմավառությամբ ու աղոթքով հարգեցին Օսմանյան Թուրքիայի կողմից 1915-1923 թվականներին իրականացված Հայոց ցեղասպանության սրբադասված նահատակների հիշատակը:
Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի տեղեկատվության եւ հասարակայնության հետ կապերի բաժնից, Գավառ քաղաքում Հայոց ցեղասպանության զոհերի հիշատակը հավերժացնող հուշարձանին ծաղկեպսակներ եւ ծաղիկներ խոնարհեցին Գեղարքունիքի մարզպետարանի եւ Գավառի քաղաքապետարանի աշխատակազմերի, քաղաքի կրթամշակութային եւ առողջապահական հաստատությունների, իրավապահ համակարգի աշխատակիցներ, Արցախյան ազատամարտի եւ Ապրիլյան քառօրյա պատերազմի մասնակիցներ, պատանի երկրապահներ, բազմաթիվ անհատ քաղաքացիներ: Այնուհետեւ հարգանքի տուրքի մատուցումը շարունակվեց Գավառի Սուրբ Աստվածածին եկեղեցում, որտեղ Գեղարքունյաց թեմի հոգեւոր դասի կողմից մատուցվեց Բարեխոսության կարգ՝ ի հիշատակ Հայոց ցեղասպանության սրբադասված նահատակների: Ներկաները հարգանքի տուրք մատուցեցին աղոթքով ու մոմավառությամբ:
Սեւանի քաղաքապետարանի աշխատակազմից ստացված տվյալներով՝ Սեւան քաղաքում երթը դեպի Հայոց ցեղասպանության զոհերի հիշատակը հավերժացնող հուշախաչքարի տարածք սկսվել է առավոտյան ժամը 10-ից եւ շարունակվել մինչեւ ժամը 13-ը: Երթը գլխավորել է Սեւանի քաղաքապետ Սարգիս Մուրադյանը: «Երթը բազմամարդ էր: Մեր սուրբ նահատակներին հիշատակի տուրք մատուցելու էին եկել աշխատանքային կոլեկտիվներով, ընտանիքներով, դպրոցականների, ազատամարտի վետերանների, երկրապահների խմբերով: Նրանք խոնարհումով ու ծաղկեդրմամբ հարգեցին Հայոց ցեղասպանության զոհերի հիշատակը, ապա քաղաքի Սրբոց Հրեշտակապետաց եկեղեցում մասնակցեցին Բարեխոսության կարգին, որը մատուցեց Գեղարքունյաց թեմի Սեւանի հոգեւոր հովիվ Տեր-Ստեփանոսը: Դպրոցականները երթին մասնակցեցին «Հիշում ենք եւ պահանջում», «Ներկան պահանջում է» եւ այլ ցուցապաստառներով: Երթի մասնակիցները ներքուստ ոգեւորված էին համազգային միասնության ու զարթոնքի նոր ալիքից»,-նշեց Սեւանի քաղաքապետի խորհրդական Արմինե Ղուկասյանը:
Մարտունու քաղաքապետարանի աշխատակազմից ստացված տվյալներով՝ երթը դեպի քաղաքի Սուրբ Աստվածածին եկեղեցու բակ սկսվել է քաղաքապետարանից: «Երթին մասնակցեցին քաղաքապետարանի աշխատակազմի, ենթակա կազմակերպությունների, ՀՀ ոստիկանության, ԱԻՆ ստորաբաժանումների, կրթամշակութային եւ առողջապահական հաստատությունների աշխատակիցներ, դպրոցականներ, անհատ քաղաքացիներ: Նրանք Սուրբ Աստվածածին եկեղեցու բակում ծաղիկներ ու ծաղկեպսակներ դրեցին Հայոց ցեղասպանության զոհերի հիշատակը հավերժացնող խաչքարին, որը քանդակվել է Հին Ջուղայի խաչքարերից մեկի բնօրինակով եւ տեղադրվել Հայոց ցեղասպանության հարյուրամյա տարելիցի օրը: Ապա հիշատակի տուրքը շարունակվեց եկեղեցում՝ աղոթքով եւ մոմավառությամբ: Բարեխոսության կարգ կատարեց Գեղարքունյաց թեմի Մարտունու տարածքի հոգեւոր հովիվ Տեր-Սիմոն քահանա Մկրտչյանը: Մարտունու մշակույթի տանը կազմակերպվեց գրական-երաժշտական ցերեկույթ՝ նվիրված Հայոց ցեղասպանությանն առնչվող պատմական իրադարձություններին»,-ներկայացրեց Մարտունու քաղաքապետ Արմեն Ավետիսյանը:
Ճամբարակ քաղաքում քաղաքապետ Վազգեն Ադամյանի գլխավորությամբ երթը դեպի Սուրբ Հովհաննես մատուռի բակում տեղադրված խաչքար-հուշարձան սկսվեց առավոտյան ժամը 11-ին քաղաքապետարանից եւ ավարտվեց Մարտունի գյուղի Հայոց ցեղասպանության զոհերի հուշարձանի մոտ: «Երթին մասնակցեցին քաղաքապետարանի աշխատակազմի եւ ենթակա կառույցների, դպրոցների, առողջության կենտրոնի, այլ հիմնարկ-ձեռնարկությունների աշխատակիցները, աշակերտները, բազմաթիվ անհատ քաղաքացիներ: Սուրբ Հովհաննես մատուռում Բարեխոսության կարգ կատարեց Գեղարքունյաց թեմի Ճամբարակի տարածքի հոգեւոր հովիվ Տեր-Պսակ քահանան: Մեր սրբադասված նահատակների հիշատակը հարգվեց ծաղկեդրմամբ, մոմավառությամբ եւ աղոթքով: Ապա երթը շարժվեց Ճամբարակ համայնքի կազմ մտնող Մարտունի գյուղ, որը ձեւավորվել է 1920-ական թվականներին Ցեղասպանությունից վերապրած արեւմտահայ ընտանիքներից: Այստեղ դեռեւս խորհրդային տարիներից կանգնեցված է Հայոց ցեղասպանության զոհերի հուշարձանը, որտեղ եւս տեղի ունեցավ ծաղկեդրման եւ ոգեկոչման արարողություն»,-ներկայացրեց Ճամբարակ համայնքի ղեկավարի տեղակալ Ռոբերտ Օհանյանը:
Վարդենիս քաղաքում երթը մեկնարկեց առավոտյան ժամը 11-ին քաղաքապետարանի մոտից եւ ձգվեց դեպի Վիկտոր Համբարձումյանի անվան զբոսայգում տեղադրված եւ Հայոց ցեղասպանության զոհերի հիշատակի նորաբաց հուշաքար, որի օծումը կատարվեց ձեռամբ Գեղարքունյաց թեմի առաջնորդական տեղապահ Տեր-Կիրակոս վարդապետ Դավթյանի: Վարդենիս համայնքի ղեկավար Արամ Հարությունյանի հավաստմամբ՝ ծաղկեդրման, Վարդենիսի Սուրբ Աստվածածին եկեղեցում մատուցված Բարեխոսության կարգին ու մոմավառությանը մասնակցեցին քաղաքապետարանի աշխատակազմի, ենթակա կազմակերպությունների, կրթական եւ առողջապահական հաստատությունների աշխատակիցներ, դպրոցականներ, բազմաթիվ քաղաքացիներ:
Ծաղիկներ եւ ծաղկեպսակներ խոնարհվեցին նաեւ Ծովինար, Դդմաշեն, Փոքր Մասրիկ, Վաղաշեն գյուղերում, Գավառ քաղաքի Հացառատ թաղամասում վերջին տարիներին տեղադրված հուշարձաններին: