Պարոն վարչապետ, ցավալի է, որ չսիրվեցիք, բայց ո՞վ է մեղավոր. Արսինե Խանջյան (լուսանկարներ, ուղիղ միացում)

Իմ Քայլը շարժման նախաձեռնության մասնակիցները շարունակում են հանրահավաքը Հանրապետության հրապարակում:

Նշենք, որ դերասանուհի Զառան, դերասան Սերգեյ Դանիելյանը ևս միացել են պայքարին, ելույթ ունեցան հարթակից: Զառայի խոսքերով տանը, բազմոցին նստած հարց չի լուծվի, պետք է գալ ու պայքարել սեփական անձի, իրավունքի ու իշխանության համար:

Սերգեյ Դանիելյանը նշեց, որ բոլոր իր տարիքի մարդիկ հորդորում են երեխաներին, թե գործ չունեք, նստեք, մի խառնվեք, բայց պետք է միայն հաշվի առնել այն սկզբունքը, որ որդեգրվել է՝ ամեն ինչ անել խաղաղ: «Ես հավատում եմ, որ ոչ մի բան իզուր չի»,ասաց նա:

Հրապարակում է նաև երգիչ Ռուբեն Հախվերդյանը, ով ևս աջակցում է այս ցույցերին:

Կապ էհաստատվել սփյուռքահայ դերասանուհի Արսինե Խանջյանի հետ, ում ելույթը միացվեց բարձրախոսով: Նա Գերմանիայից հայտնում է, որ փափագում էր միանալ այս պայքարին, սիրտն ու հոգին հիմա լալիս են, բայց ուրախությունից:

«Հեղափոխությունը երբ հանդարտ է, ավելի վտանգավոր է իշխանության համար, ձեր պայքարը ճիշտ է և օրինավոր, այս անգամ չընկրկեք, պայքարեք մինչև վերջ: Մենք այստեղ, տասնյակ մտավորականներով ձեր կողքին ենք: Կխնդրեմ իշխանության բոլոր ուժերին միասնաբար մասնակցել ձեր գործողություններին: Այսօրվա համակարգը անօրեն է իր պատմական և ներկա ձևավորումներով: Շարունակեք այս հեղափոխությունը առանց վախի, իսկ ոստիկաններին հորդորում եմ, դուք պետք է պահպանեք ցուցարարներին, ոչ թե օլիգարխների գլուխը, մնացեք պաշտպանն այդ երիտասարդությանն ու նրանց արդար բռունքներին: Մասնակցեք՝ մերժելով ձեզ վտանգող ամեն ինչ: Վերջին խոսքս այս վարչապետինն է՝ բավ է այս տառապանք, որ ունի այս ժողովուրդը, ցավալի է, որ չսիրվեցիք, բայց ո՞վ է մեղավոր: Ես Հայաստանի քաղաքացի չեմ, բայց ես հայ եմ, մենք հայ ռազմիկներ ենք, ուր էլ լինենք, պետք է ծառայենք այս ազին՝ նվիրված: Այո դուք կարող եք, և ոչինչ չի լինի, եթե ձեր պաշտոնից հրաժարվեք, կան մարդիկ, որոնք կարող են այս ժողովրդին փրկել:

Ես հայ եմ , ինչպես եւ դուք՝ ուր էլ որ լինենք: Շարունակելու եմ մոտիկից հետեւել ձեր գործողություններին, հաջողություն եւ առայժմ, ձեր՝ Արսինե»: