Առևտրի կենտրոնում հրդեհ է բռնկվել, հրդեհաշիջման ինքնաշխատ համակարգը չի գործել. ուսումնավարժանք «Պրոսպեկտ Մոլ»-ում
Հյուրանոցային ու ռեստորանային համալիրներում, սննդի կետերում, առևտրի և ժամանցի խոշոր կենտրոններում հակահրդեհային պատրաստվածության ուսումնական վարժանքները շարունակվում են: Հերթականն անցկացվել է ապրիլի 19-ին ժամը 02:00-ին, «Երևան Սիթի» Պրոսպեկտ Մոլ առևտրային համալիրում:
ԱԻՆ փրկարար ծառայության «Հրդեհի դեպքում կազմակերպության աշխատակիցների և այցելուների տարհանումը» թեմայով հատուկ տակտիկական ուսումնավարժության պլանի համաձայն՝ հրդեհն առաջացել է «Պրոսպեկտ Մոլ» առևտրային համալիրի 1-ին հարկի առևտրի կետում, հրդեհաշիջման ինքնաշխատ համակարգը չի գործել, աշխատակիցների կողմից ձեռնարկվել են նախնական հրդեհաշիջման աշխատանքներ, սակայն հրդեհը մարել չի հաջողվել և տարածվել է 1-ին հարկի մյուս առևտրի կետեր և 2-րդ հարկ:
Առաջին հարկը ծխապատ է և ծխապատված գոտում մարդիկ կան: Հրշեջ-փրկարարական ստորաբաժանումների ժամանման պահին հրդեհի մակերեսը կազմել է 35 ք.մ.: Ժամանելով դեպքի վայր՝ հակահրդեհային խումբը հրդեհաշիջում է իրականացրել առաջնային հրդեհաշիջման միջոցներով` կրակմարիչներով և ներքին հրշեջ ծորակներով, իսկ փրկարարական խումբը որոնողափրկարարական աշխատանքներ է կատարել: Ժամը 02:35 հրդեհաշիջման ղեկավարը հրդեհի մարման մասին ռադիոկապով հաղորդում է ԱԻՆ Ճգնաժամային կառավարման ազգային կենտրոն:
Ուսումնավարժանքին ներգրավված էին ԱԻՆ փրկարար ծառայության 6 մարտական հաշվարկ և մեկ ավտոսանդուղք: Վարժանքի ընթացքում հայտնաբերվել են բավականաչափ թերություններ, որոնց շտկման նպատակով ԱԻՆ փրկարար ծառայությունը կազմակերպություններից յուրաքանչյուրի հետ կազմելու է հրդեհային անվտանգության և արձագանքման անհատական պլաններ:
Այս ամսվա ընթացքում ԱԻՆ փրկարար ծառայությունը Երևանում, ընդհանուր առմամբ, 20 հակահրդեհային ուսումնավարժանք է իրականացնելու:
Նշենք, որ ԱԻՆ-ը հակահրդեհային պատրաստվածության լայնածավալ ուսումնական վարժանքներ և ստուգումներ է իրականացնում ապրիլի 2-ին Երևանի Հյուսիսայում պողոոտայում գործող «Բուրգեր Քինգ» արագ սննդի կետում տեղի ունեցած պայթյունից հետո: Պայթել էր լցնովի գարեջրի ճնշումն ապահովող 20 կգ-անոց բալոնը: Պատահարի հետևանքով 8 մարդ տուժեց, այդ թվում՝ օտարերկրյա քաղաքացիներ: