Արևային էներգետիկայի սակագների հետագա նվազեցումը բացառված չէ․ փոխնախարար
Արևային էներգետիկայի սակագների հետագա նվազեցումը բացառված չէ, եթե արևային էլեկտրակայանների մասնաբաժինն ընդհանուր էներգետիկայի հաշվեկշռում ավելանա։ Այս մասին ֆեյսբուքյան իր էջում հրապարակված տեսահաղորդագրությունում նշել է Էներգետիկ ենթակառուցվածքների և բնական պաշարների փոխնախարար Հայկ Հարությունյանը՝ մեկնաբանելով «Ժամանակ» օրաթերթի հոդվածը, որում քննադատության էր ենթարկվում այն սակագինը, որն առաջարկվել էր «Մասրիկ-1» արևային կայանի շինարարության ծրագրի ներդրողների կողմից։
Նրա խոսքով՝ սա, վերջնական արդյունքում, դրական կանդրադառնա էլեկտրաէներգիայի սպառման սակագների վրա։
Փոխնախարարը հիշեցրել է, որ 550 մՎտ հզորությամբ «Մասրիկ-1» արևային կայանի կառուցման մրցույթը շահել է համաշխարհային ճանաչում ունեցող երկու ընկերություններից՝ նիդեռլանդական Fotowatio Renewable Ventures-ից (FRV) և իսպանական FSL Solar S.L-ից, բաղկացած միջազգային կոնսորցիումը: Վերջիններս ամենացածր սակագինն էին առաջարկել՝ 0.0419 դոլար (առանց ԱԱՀ-ի) կամ 20.11 դրամ՝ 1 կՎտ/ժ-ի համար:
«Ես վստահ եմ, որ ներդրողը կօգտվի մասնագիտացված ֆոնդերի և ծրագրերի աջակցությունից և ներդրումների միջավայրի հետ կապված խնդիրներ չի ունենա»,-նշել է Հայկ Հարությունյանը։
Հոդվածում, ինչպես պարզաբանել է փոխնախարարը, նշվում է, որ մեկ տարի առաջ Հանրային ծառայություններն կարգավորող հանձնաժողովն արևային էլեկտրակայանի կառուցման լիցենզիաների տրամադրման մրցույթ էր հայտարարել։ Հայկ Հարությունյանի խոսքով՝ նման մրցույթ չի եղել։ 2016 թվականին 1 մեգավատանոց և առավելագույնը 10 մեգավատ հզորությամբ արևային կայանների կողմից արտադրված արևային էներգիայի համար հայտարարվել էր 42,6 դրամ սակագին։ Այն ժամանակ, փոխնախարարի փոխանցմամբ, մեկ այդպիսի կայան կառուցելու ներդրումային ծրագիրը կազմում էր 1,1 մլն դոլար։ Հիմա մեկ կայանի գինը նվազել է 35-40 տոկոսով, որը պայամանավորված է միջազգային գների 25 տոկոս նվազմամբ։ Այդ ծրագրով դրական արդյունքներ են գրանցվել Հայաստանում՝ կառուցվել են 3 համակարգային կայաններ, որոնց արդեն միացված են ցանցին։
«Մենք զարգացնում ենք տեղական ռեսուրսները, այդ թվում՝ տեղական մասնագետների ներուժը, շինարարների փորձը, ինչպես նաև ֆինանսական միջոցների հասանելիությունը՝ բանկերն արդեն ունեն հասանելի երկարաժամկետ ռեսուրսներ»,-նշել է նա։
Նա հայտնել է, որ ՀԾԿՀ-ի կողմից հայտարարված մինչև 1 մեգավատ սահմանափակումը պայմանավորված է միջազգային գների նվազեցմամբ։
«2016 թվականին մեզ քննադատում էին 1 ԿՎ/ժ էլեկտրաէներգիայի համար սահմանված բարձր՝ 42,6 դրամ սակագնի համար, հիմա քննադատում են ցածր՝ 20,11 սակագնի համար, ինչն անընդունելի է, քանի որ այն ժամանակ այլ կապիտալ ներդրումներ էին պահանջվում»,-շեշտել է նա։ Նրա խոսքով, չի կարելի համեմատել 55 ՄՎտ և 1 ՄՎտ կայանների շինարարության համար անհրաժեշտ կապիտալ ներդրումները։
«Ինչու չօգտվել ցածր սակագնից, որը մեզ առաջարկել է կոնսորցիումը, եթե մեր արևի ինտենսիվությունը հնարավորություն է տալիս ունենալ ավելի էժան էներգիայի աղբյուր ներքին ռեսուրսների հաշվին»,-նշել է նա։
Նրա խոսքով՝ ցածր սակագինը չի ազդի փոխադարձ հաշվարկների (net metering) վրա, քանի որ գեներացված էլեկտրաէներգիայի ավելցուկը կվաճառվի հիդրոէլեկտրակայանին 1 կՎտ/ժ 23 դրամով: