Ուզում եք ասել, որ այդ բոլոր նշանակումները եղել են քաղաքականապես կաշկանդվա՞ծ, և այդ մարդիկ քաղաքական ուժի պատվերնե՞րն են կատարելու. Մարուքյան

Ես ապշած եմ տեսակետով, որ եթե ընդդիմությունը ՏՄՊՊՀ-ում անդամի թեկնածու առաջարկի, դա կնշանակի, որ նա կաշկանդված կլինի քաղաքական կուսակցության մոտեցումներով: Այս մասին, այսօր՝ մարտի 23-ին, ԱԺ-ում «Տնտեսական մրցակցության պաշտպանության մասին» ՀՀ օրենքում լրացումներ և փոփոխություններ կատարելու մասին» օրենքի նախագծի երկրորդ ընթերցմամբ քննարկման ժամանակ նշեց «Ելք» խմբակցության պատգամավոր Էդմոն Մարուքյանը:

Նա նկատեց, որ ԱԺ խմբակցություններն իրավունք ունեն Բարձրագույն դատական խորհրդի անդամի թեկնածու առաջարկել, նախօրեին ԱԺ-ն ՍԴ նախագահ է նշանակել, որին առաջարկել էր ԱԺ նախագահը. «Ուզում եք ասել, որ այդ բոլոր նշանակումները եղել են քաղաքականապես կաշկանդվա՞ծ, և այդ մարդիկ քաղաքական ուժի պատվերնե՞րն են կատարելու: Դա աշխարհով մեկ հայտնի սկզբունքն է: Այդ մարդն ընտրվելու դեպքում դառնում է անաչառ: Նաև ապրիլի 9-ից հետո ԱԺ-ում վճռաբեկ դատարանների դատավորներ ենք նշանակելու, հիմա ուզում եք ասել, որ նրանք ԱԺ պատվերն են կատարելո՞ւ»,-հարց ուղղեց Մարուքյանը:

Ի պատասխան ՏՄՊՊՀ նախագահ Արտակ Շաբոյանն ասաց, որ սովորաբար մրցակցային պաշտպանության մարմինները անկախ են, այդպես է նաև հայաստանում. «Պատահական չէ, որ այդ մարմիններն անկախ են կառավարությունից, որովհետև մրցակցության պաշտպանությունն այնպիսի գործառույթ է, որը լիարժեք պետք է անկախ լինեն, այդ թվում քաղաքականությունից: Հանձնաժողովի անդամը կուսակցությունների կողմից առաջադրվելու դեպքում, եթե անգամ կուսակցական չլինի, որոշակի կաշկանդվածություն կունենա իր մասնագիտական գործունեության ընթացքում»:

Հիշեցնենք, որ ՀՅԴ-ն առաջարկել էր, որ ՏՄՊՊՀ անդամներից մեկի թեկնածությունը ներկայացնեն ընդդիմադիր պատգամավորները, ինչը մերժվել է: