Ահազանգ. «Հայբուսակ»-ի ուսանողները վճարել են ուսման վարձը, սակայն վկայական չեն ստացել
«Ժողովուրդ» օրաթերթը գրում է. ««Ժողովուրդ» օրաթերթ են ահազանգել Տավուշի մարզի բնակիչները, որոնց զավակները սովորել են «Հայբուսակ» համալսարանի Իջևանի մասնաճյուղում, պարտաճանաչ վճարել ուսման վարձը, սակայն այդպես էլ կրթության վկայական չեն ստացել: Այդ կապակցությամբ մենք գրավոր հարցում ենք ուղարկել ՀՀ քննչական ծառայություն, ի պատասխան` օրերս ստացել ենք գրավոր պատասխան, ուր նշված է. «Երևանի «Հայբուսակ» համալսարանի Իջևան քաղաքի ներկայացուցչության տնօրենի կողմից 2013-2014 ուսումնական տարում նույն քաղաքի բնակչի կողմից ստացված «Հայբուսակ» համալսարանի Իջևանի մասնաճյուղում ընդունվելու և սովորելու պատրվակով մաս-մաս, որպես վարձավճար վերցված գումարը յուրացնելու դեպքի առթիվ ՀՀ ոստիկանության Իջևանի բաժնում հարուցվել է քրեական գործ` ՀՀ քրեական օրենսգրքի 179-րդ հոդվածի 2-րդ մասի 1-ին կետի և 325-րդ հոդվածի 1-ին մասի հատկանիշներով, որով նախաքննությունը շարունակվում է:
ՀՀ քննչական կոմիտեի Տավուշի մարզի քննչական վարչությունների գործունեության վերահսկողության գլխավոր վարչությունում: Քրեական գործով ձեռնարկվում են մեծածավալ քննչական և դատավարական այլ գործողություններ դեպքի հանգամանքների բազմակողմանի, օբյեկտիվ և լրիվ քննություն ապահովելու ուղղությամբ»: Ուշագրավ է, որ 4-5 տարի առաջ կատարված ապօրինության վերաբերյալ մեծածավալ քննչական գործողությունները դեռևս արդյունք չեն տվել, քննությունը չի ավարտվել, որևէ մեկին մեղադրանք չի առաջադրվել: Դա այն դեպքում, երբ մեղադրյալները և մեղադրանքն ակնհայտ են:
Ավելի մանրամասն՝ «Ժողովուրդ» օրաթերթի այսօրվա համարում: