Շիրակի պետհամալսարանում դասադուլ են հայտարարել. Ուսանողները բաց նամակով դիմել են ՀՀ նախագահին (լուսանկարներ)
Շիրակի պետական համալսարանի ուսանողական խորհրդի նախագահ Արմեն Մելքոնյանը և շուրջ 50 ուսանողներ բաց նամակով դիմել են հանրապետության նախագահ Սերժ Սարգսյանին՝ պահանջելով բեկանել բուհի ռեկտոր Սահակ Մինասյանի որոշումը, ըստ որի աշխատանքից ազատվել են բուհի դասախոսներ Գագիկ Համբարյանը և Հովհաննես Խորիկյանը և անհապաղ նրանց վերադարձնել աշխատանքի:
«Մենք բազմիցս դիմել ենք ՀՀ ԿԳ նախարար Լևոն Մկրտչյանին, բայց մեր բողոքներն ամեն անգամ անպատասխան են մնացել։ Հերթական անգամ հայտարարում ենք դասադուլ և պահանջում.
1. Բեկանել ռեկտորի մարտի 15-ի որոշումը և անհապաղ աշխատանքի վերադարձնել Հ. Խորիկյանին ու Գ. Համբարյանին։
2. Ապահովել մարտի 24-ին կայանալիք գիտխորհրդի և հոգաբարձուների խորհրդի համատեղ ընդլայնված նիստի թափանցիկությունը, այն կազմակերպել լրագրողների, բողոքին մասնակցող ուսանողների հատուկ խմբի և Հ. Խորիկյանի ու Գ. Համբարյանի ներկայությամբ։
3. Ապահովել բուհի ֆինանսական վիճակի թափանցիկությունը և համալսարանի պաշտոնական կայքում զետեղել բուհի 2016 թվականի փոփոխված և 2017 թվականի նախահաշիվները և նույն թվականների ֆինանսական հաշվետվությունները, 2018 թվականի բյուջեի նախահաշիվները։
Պարո՛ն նախագահ, հուսով ենք, որ արդարությունը կվերականգնեք», - ասված է բաց նամակում։
Ավելի վաղ հաղորդել էինք, որ ՇՊՀ ռեկտոր Սահակ Մինասյանի հրամանով աշխատանքից ազատվել են դասախոսներ Գագիկ Համբարյանն ու Հովհաննես Խորիկյանը, որոնք ամիսներ շարունակ բարձրաձայնում էին ռեկտորի «ապօրինությունների» մասին: