«Եղել են դեպքեր, որ ամիսներով ինձ հետ չեն խոսել». Գագիկ Հարությունյանը իշխանությունների հետ ունեցած կոնֆլիկտներից է պատմել

«Ես չեմ ցանկանա քննության ընթացքում գտնվող որևէ գործի վերաբերյալ կարծիք հայտնել, որովհետև Բարձրագույն դատական խորհրդի անդամներին չի թույլատրվում արտադատական պրոցեսի վերաբերյալ կարծիք արտահայտել: Ցանկացած գործ, որն իրավական գործընթացում է, պետք է լինի թափանցիկ, լիարժեք քննության առարկա դառնա»,- այսօր լրագրողների հետ զրույցում ասաց Բարձրագույն դատական խորհրդի նախագահ, ՍԴ նախկին նախագահ Գագիկ Հարությունյանը՝ անդրադառնալով հարցին, թե արդոք Մարտի մեկի գործով չպե՞տք է հարցաքննվեն Ռոբերտ Քոչարյանն ու Սերժ Սարգսյանը:

Լրագրողների այն հարցին, թե ո՞ւմ է նախորդ տարիներին ծառայել Գագիկ Հարությունյանը, իշխանությունների՞ն, նա պատասխանեց.

«Երբեք ես ոչ մի իշխանության նվիրված չեմ եղել: Ես իմ գործն եմ արել, իրավիճակներ են եղել, որ եթե այդ պահին այդ միջամտությունը չլիներ, կարող է մենք բոլորովին այլ իրավիճակի առաջ կանգնած լինեինք: Մարտի մեկը մեր երկրի համար եղավ ամոթալի էջերից մեկը, բայց մենք շատ ավելի ողբերգությունների առաջ կկանգնեինք, եթե համարժեք միջամտություններ չլինեին: Հակասությունների խորացումը միշտ հավաքում է կրիտիկաման զանգված, կարող է բերել պայթյունների: Պետության կառավարման կարևոր քայլերից մեկն այն է, որ դա պետք է հաղթահարվի: Ես ծառայել եմ իմ ժողովրդին ու իմ պետությանը, խիղճս մաքուր է, ես հանգիստ եմ»:

Հետո նա նշեց, որ ուզում է մի փոքրիկ գաղտնիք բացել, դեպքեր են եղել, երբ իշխանության գլուխ կանգնած մարդիկ իր հետ ամիսներով չեն խոսել:

«Ես մի փոքր փակագիծ բացեմ: Մարտի մեկից առաջ էր, ուրիշ առիթով էր: Բարդագույն իրավիճակ էր, գիշերը ժամը 2 անց կես ինձ լուր տվեցին, որ պայթյուն է սպասվելու: Ես գնացի, հավաքեցի մարդկանց, սկսեցինք քննարկումները մինչև հաջորդ օրվա ժամը 4-ը: Որևէ արդյունքի չհասանք, իրավիճակն արդեն այնպիսին էր, որ ավտոմատները պատրաստ են, կամուֆլյաժները հագած՝ մարդիկ գնում էին որոշակի գործողությունների, որոնք կարող էին ունենալ շատ ավելի մեծ հետևանքներ: Եվ իմ քննարկումների սկզբունքը հետևյալն էր՝ մեկ կաթիլ արյունն էլ չի կարող արդարացնել ցանկացած նպատակ, և պետության մեջ չպետք է լինի նախադեպ: Երբ արդեն վերջում տեսնում եմ, որ չենք կարողանում կոնֆլիկտը հաղթահարել, ես բավական զայրացած, կյանքում իմ շուրթերից որևէ մեկը հայհոյանք չի լսել, այդտեղ ներկաները լսեցին, ասացի՝ ուրեմն առաջին զոհը ես պետք է լինեմ, եթե դուք գնում եք նման քայլերի: Այդտեղ կոնֆլիկտի ամենազորեղ կողմերից մեկը ձեռքը տանում է գրպանը, ի՞նչ կմտածես, թե ինչ կարող է հանել, և հանկարծ շինելի գրպանից հանում է Սահմանադրությունը: Ես ապշած նայում եմ, բացում է՝ տեսնում եմ կարմիրով նշումներ: Եվ երկու ժամվա ընթացքում մենք կարողացանք լուծումներ գտնել»,- պատմեց նա:

Հարցին, թե երբ է եղել այդ դեպքը, հոկտեմբերի 27-ի՞ն, նա պատասխանեց՝ դրանից հետո:

Գագիկ Հարությունյանը հավելեց, որ դրանից հետո տարբեր առիթներով իշխանավորները պարբերաբար իր հետ չէին խոսում: «Եղել են դեպքեր, որ ամիսներով ինձ հետ չեն խոսել»,- նշեց նա: