ԱՄՆ Ներկայացուցիչների պալատի 30-ից ավելի անդամներ միացել են Արցախի և ՀՀ-ի համար 70 մլն դոլարի օգնության կոչին

ԱՄՆ Ներկայացուցիչների պալատի 36 անդամ միացել է Կոնգրեսի Հայկական հարցերով հանձնախմբի համանախագահ, ԱՄՆ Կոնգրեսի Ներկայացուցիչների պալատի անդամ Ֆրենկ Փալոնին՝ կոչ անելով Ներկայացուցիչների պալատի արտաքին օգնության հատկացումների հանձնաժողովի նախագահ Հոլ Ռոջերսին և կոնգրեսական Նիտա Լովեյին սատարել Արցախի և Հայաստանի համար 2019 ֆինանսական տարում 70 միլիոն դոլարի օգնության փաթեթին, հաղորդում է Հայ դատի ամերիկյան հանձնախումբը:

«Մենք ցանկանում ենք ևս մեկ անգամ մեր երախտիքը հայտնել կոնգրեսական Փալոնին, Հայկական հարցերով հանձնախմբի նրա գործընկերներին և բոլոր նրանց, ովքեր միացել են Արցախի և Հայաստանի համար «խաղաղության և բարգավաճման» օգնության փաթեթին աջակցելուն։ Այս նամակում ամրագրված են խաղաղության, բարգավաճման և երկարաժամկետ կայունության առաջնահերթությունները»,- ասել է Հայ դատի ամերիկյան հանձնախմբի գործադիր տնօրեն Արամ Համբարյանը:

Հիշեցնենք, որ ավելի վաղ Ամերիկայի Հայ Դատի հանձնախումբը դիմել էր Սենատի՝ 2019 ֆինանսական տարվա արտաքին օգնության օրինագծի մշակման համար պատասխանատու հանձնաժողովին՝ կոչ անելով 70 միլիոն դոլարի օգնության փաթեթ տրամադրել Արցախի ականազերծման և վերականգնման, սահմանից դիպուկահարների հեռացման Ռոյս-Էնգել նախագծի կյանքի կոչման, ԱՄՆ-Հայաստան տնտեսական և ռազմական համագործակցության ծավալման և Հայաստանին որպես Մերձավոր Արևելքում փախստականների ապաստարանի աջակցելու համար:

Մասնավորապես, Հանձնախումբը առաջարկել է 6 միլիոն դոլար տրամադրել Արցախին՝ ականազերծման և հաշմանդամների վերականգնման համար և 4 միլիոն դոլար՝ խաղաղության աջակցման համար, ինչպես նաև 30 միլիոն դոլար Հայաստանին՝ որպես տնտեսական օգնություն, 10 միլիոն դոլար՝ որպես ռազմական օգնություն, 20 միլիոն դոլար՝ որպես Մերձավոր Արևելքից փախստականների ընդունման համար օգնություն: Նաև առաջարկվում է կասեցնել Ադրբեջանին տրամադրվող ռազմական օգնությունը: