Առեղծվածային դեպք Արմավիրի մարզում. 49-ամյա կինը հում միսն ուտելիս՝ շնչահեղձ է եղել և մահացել

Առեղծվածային դեպք Արմավիրի մարզում: 49–ամյա կինը հում միսն ուտելիս՝ շնչահեղձ է եղել: Մայրը նրա պարանոցը սեղմելով՝ փորձել է մսի կտորը դուրս բերել կոկորդից, բայց աղջիկը մահացել է:

Հայաստանի քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քր. օր.-ի 109 հոդվածի 1-ին մասի (անզգուշությամբ մահ պատճառելը) հատկանիշներով:

Shamshyan.com-ի տվյալներով՝  նշված քրգործը հարուցվել է այս տարվա մարտի 6-ին Արմավիր քաղաքի շտապօգնության կայանից ստացված ահազանգի փաստով: Ժամը 21:00-ի սահմաններում նշված բժշկական կենտրոնից Ոստիկանության Արմավիրի բաժին տեղեկացրել են, որ հերթապահ խումբը կանչով մեկնել է Մաշտոցի փողոցի շենքերից մեկի բնակարան, որտեղ հայտնաբերել են հանկարծամահ եղած մի քաղաքացու:

Ահազանգով նշված հասցե է մեկնել Ոստիկանության Արմավիրի բաժնի հետաքննչական խումբը՝ որտեղ պարզել են, որ մահացածը նույն բնակարանի բնակիչ, 49-ամյա Նունե Դ.-ն է, ով ըստ այդ պահի տեղեկությունների՝ խոհանոցի ջրի ծորակի տակ դրված հում մսի կտորը կուլ է տվել, ինչի հետևանքով շնչահեղձ է եղել և մահացել:

Նյութերի նախապատրաստման ընթացքում պարզվել է, որ Նունե Դ.-ն, երբ մսի կտորը կուլ է տվել ու շնչահեղձ է եղել, այդ ամենը կանխելու նպատակով նրա մայրը՝ 71-ամյա Ռուզաննա Հ.-ն, ձեռքերով սեղմել է աղջկա պարանոցը՝ փորձելով կոկորդից հանել մսի կտորը:

Դատաբժշկական փորձաքննութունից հետո դատաբժշկական կենտրոնից մահվան վկայակայնը փոխանցել են իրավապահներին, որտեղ դատաբժշկական եզրակացության համաձայն գրվել է, որ Նունե Դ.-ի մահվան հիմնական պատճառ է հանդիսացել բութ առարկաներով պարանոցի օրգանների սեղմումը: