Վատ աշխատանքի համար ԴԱՀԿ աշխատողը պետք է ինքը փոխհատուցի, բայց պետք է հստակեցվի չափը. քննարկվում է ԴԱՀԿ փոփոխված օրենքի նախագիծը

ԱԺ պետաիրավական հանձնաժողովում քննարկվում է «Դատական ակտերի հարկադիր կատարման մասին» Հայաստանի Հանրապետության օրենքում լրացում և փոփոխություն կատարելու մասին» օրենքի նախագիծը:

Հիմնական զեկուցող, ԱԺ «Հայաստանի Հանրապետական կուսակցություն» խմբակցության պատգամավոր Միհրան Պողոսյանը նշեց, որ տեղին չէ հարկադիր ծառայողի վարչարարությամբ պատճառված վնասը փոխհատուցել միայն ԴԱՀԿ ծառայության նյութական խրախուսման և համակարգի զարգացման ֆոնդի միջոցների հաշվին։

«Ճիշտ է, որ հարկադիր աշխատողն իր վատ աշխատանքի պատճառով ինքը փոխհատուցում տա, և պետության համար ծանրաբեռնվածություն չլինի, բայց չափը չհստակեցնելու դեպքում ծառայությանը կարևոր խնդրի առաջ կկանգնեցնեք։ Պետք է նշվի, որ չափը չի կարող գերազանցել ԴԱՀԿ նյութական խրախուսման և համակարգի զարգացման ֆոնդի միջոցների 30 տոկոսը», - ասաց պատգամավորը:

Հիշեցնենք, որ կառավարությունն առաջարկում է «Դատական ակտերի հարկադիր կատարման մասին» Հայաստանի Հանրապետության օրենքում փոփոխություններ կատարել ու հարկադիր ծառայողի վարչարարությամբ պատճառված վնասը փոխհատուցել ԴԱՀԿ ծառայության նյութական խրախուսման և համակարգի զարգացման ֆոնդի միջոցների հաշվին՝ Հայաստանի Հանրապետության պետական բյուջեի վրա ընկնող լրացուցիչ բեռը թեթևացնելու նպատակով։

Ըստ Միհրան Պողոսյանի՝ եթե տուգանքն ամբողջությամբ հատկացվի միայն ծառայության բյուջեից, ապա ծառայությունն օրենքով սահմանված իր իրավունքները կյանքի կոչել չի կարողանա, քանի որ այդ բյուջեի 65 տոկոսն իրականացվում է արտաբյուջեի հաշվին. կատարողական գործողությունները կազմակերպելու համար պետության բյուջեից ծառայությանը քիչ գումար է հատկացվում։

«Եթե սահմանափակում չդնենք, ապա ծառայությունն էլեմենտար գործողություններ չի կարող անել»,-նշեց նա։

Հանձնաժողովի նախագահ Գևորգ Կոստանյանն առաջարկեց հետաձգել հարցի քննարկումը, վերամշակել և հետո քննարկել։

«Մոտեցումը հասկանալի է բոլորի համար, բայց պետք են վիճակագրական տվյալներ և հիմնավորումներ։ Կարծում եմ՝ մենք ունենք այդ հնարավորությունը, որոնք կհիմնավորեն բարձրաձայնված թվերը»,-նշեց Պողոսյանը։

Կոստանյանն էլ ընդգծեց, որ արտաբյուջետային ֆոնդ ունենալը պետք է պատճառաբանված լինի։ «Հիմա չէ, բայց առհասարակ ես խնդիր եմ բարձրացնելու արտաբյուջետային հաշիվների անհրաժեշտության և հիմնավորման հետ կապված։ Այս օրենքի կոնտեքստում սա դեռևս չենք քննարկի, բայց հեղինակին առաջարկում ենք, որ այս կարգավորումների հիմնավորումները լինեն պատշաճ։ Լրամշակեք ու նոր ներկայացրեք»,- առաջարկեց Կոստանյանը։

Միհրան Պողոսյանն էլ հակադարձեց, որ ԴԱՀԿ-ի համար այդ հարցին այլ տեսանկյունից պիտի նայել, որովհետև այդ ծառայության ծախսերի 35 տոկոսն է բյուջեից տրամադրվում։ «ԴԱՀԿ-ն սպեցիֆիկ է։ Երբեք չես կարող իմանալ, թե որքան գործ կլինի, ու դրա հետևանքով է արտաբյուջեն ձևավորվում։ Պետությունը չի կարող պլանավորել, թե որքան գործ, վարույթ կհարուցվի ծառայությունում։ Սրանով է պայմանավորված արտաբյուջեի խստագույնս անհրաժեշտությունը։ Բայց ինչպես դուք ասացիք՝ սա այսօրվա քննարկելու հարց չէ։ Համաձայն եմ հետաձգել հարցը», -ասաց նա։