Կարևոր ճշգրտում է մտցվում ԸՕ-ում՝ ուսուցչին, բուժաշխատողին արգելվում է քարոզչություն իրականացնել ի պաշտոնե, այսինքն՝ անգամ դպրոցից դուրս. Գ. Կոստանյան

ԱԺ Պետական-իրավական և մարդու իրավունքների պաշտպանության հարցերի մշտական հանձնաժողովում ««Հայաստանի Հանրապետության ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» նախագծի քննարկմանը հանձնաժողովի նախագահ Գևորգ Կոստանյանը բացատրեց, թե ինչով է պայմանավորված, որ նախընտրական քարոզչությանը ուսուցիչներին, բուժաշխատողներին նախագծով որոշակի սահմանափակման մեջ են դիտարկում, իսկ դատախազ, դատավոր, ոստիկան, բացարձակ արգելքի տակ են մտցրել:

«Այս սահմանափակումները, որոնք արդեն կիրառելի են՝ ուսուցիչների, բուժաշխատողների համար չափազանց կարևոր նորություն են, որոնք նախկինում չեն եղել: Նախկինում որոշակի սուբյեկտներ իրավունք չունեին քարոզչություն իրականացնել ծառայողական պարտականությունները կատարելիս: Այո, հարց էր առաջանում՝ ծառայողական պարտականությունների կատարումն աշխատաժամի մեջ է, թե ինչպես:

Հիմա ավելացվել է կարևոր ճշգրտում՝ ի պաշտոնե հանդես գալիս, այսինքն՝ ուսուցչին, բուժաշխատողին արգելվում է ծառայողական պարտականություններ կատարելու ժամանակահատվածում, անգամ դրանից դուրս, ի պաշտոնե քարոզչությամբ հանդես գալ»,- ասաց նա:

Կոստանյանը հայտարարեց՝ եթե ուսուցիչը կամ տնօրենը դպրոցից դուրս զանգում է որևէ ծնողի, ասում արի հանդիպենք, դա արդեն արգելվում է, դա արդեն մեխանիկորեն ի պաշտոնե հանդես գալու հատկանիշ է, ինչն իրավախախտման է հանգեցնում:

Կոստանյանը, դիմելով «Ծառուկյան» խմբակցության պատգամավոր Գևորգ Պետրոսյանին, նշեց, թե նրա մտահոգությունը բացարձակ փարատված է: Նշենք, որ Պետրոսյանը պահանջում էր ընդհանրապես արգելել մանկավարժներին ու բուժաշխատողներին նախընտրական քարոզչությամբ զբաղվել, ինչպես հատուկ ծառայողների դեպքում է:

Պետրոսյանը դիտարկեց, թե գուցե տնօրենը զանգում է և ծնողին և ժամադրում՝ որպես քաղաքացի:

Հանձնաժողովի նախագահը նշեց, որ եթե որպես քաղաքացի ժամադրի, կուզեք կգնաք, չեք ուզի, չեք գնա: «Ցանկացած դեպքում, իրավունք ունեք, եթե գտնում եք, որ տնօրենը զանգեց, ի պաշտոնե հանդես եկավ, կարող եք չգնալ և բողոքեք: Իսկ եթե տնօրենին ընկալում եք հարազատ անձ, ձեր սուբյեկտիվ որոշելիքն է»,- ասաց նա:

Նախագիծն առաջին ընթերցման ներկայացնելու համար քվեարկությանը «Ծառուկյան» խմբակցության 4 անդամները ձեռնպահ քվեարկեցին:

Կոստանյանը նկատեց, որ «եթե փաստարկները չեն բավարարում, գուցե դեմ քվեարկեն»:

Պետրոսյանը բացատրեց, թե ձեռնպահի հիմնավորումը ինքնանպատակ չէ, քանի որ նախագծի մյուս դրույթներին կողմ են:

«Այսինքն՝ լրիվ դեմ չենք, բոլոր դրույթներին, բայց հուզող հիմնական հարցում Կառավարությունը մերժողական մոտեցում ունի, եթե մենք արժեքավոր բաներ տեսնում ենք, ոչ թե քաղաքական կոմպոնենտ կա, այլ իրավական»,- ասաց նա:

Նախագիծը մեծ օրակարգում ընդգրկվելուն բոլորն էին կողմ: