Հայկական սնունդը համեղ է, բայց պետք է ստեղծել շրջանակ, որը կապահովի սննդի անվտանգ լինելը. Սվիտալսկին

Հայաստանում Եվրամիության պատվիրակությունն աջակցում է սպառողների իրավունքների պաշտպանության գործընթացին: Այս մասին սպառողների իրավունքների պաշտպանության միջազգային օրվան նվիրված «Անվտանգ սնունդ, թվային լուծումներ» խորագրով գիտաժողովի ժամանակ հայտարարեց Հայաստանում ԵՄ պատվիրակության ղեկավար, դեսպան Պյոտր Սվիտալսկին:

Վերջինս նշեց, որ ինքը տեղյակ է, թե ինչ ծրագրեր է իրականացնում կառավարությունը՝ պաշտպանելու սպառողների իրավունքները:

Պյոտր Սվիտալսկին նշեց, որ վարչապետի ներկայությունը գիտաժողովին ցույց է տալիս, որ կառավարությունը կարևորում է այս հարցը:

«Սննդի անվտանգությունը սերտ կապված է ոչ միայն մարդու առողջության, կենսակերպի հետ, այլև՝ առողջ տնտեսություն ունենալու հետ: Վարչապետի ներկայությունը ցույց է տալիս, որ կա ցանկություն կայուն ու ծանրակշիռ տնտեսություն ունենալու:

Հուսով եմ, որ այս գիտաժողովը կնպաստի արտահանման ծավալների աճին, տարածմանը: Հայկական սնունդը համեղ է, բայց պետք է ստեղծել շրջանակ, որը կապահովի սննդի անվտանգ լինելը»,-ասաց Սվիտալսկին:

Դեսպանը նշեց, որ սերտիֆիկացման համակարգն արդեն ներդրվել է, հայկական մեղրն օրինակ արտահանվում է Եվրամիության անդամ-պետությունների շուկա: Նա հույս հայտնեց, որ խեցգետիններն էլ մուտք կգործեն եվրոպական շուկա նույն կերպ:

«Մենք ճիշտ ուղղության վրա ենք: Ճիշտ ուղղությամբ ենք առաջ շարժվում: Մենք կիսում ենք այն կարևորությունը, որը ցուցաբերում է ՀՀ կառավարությունն այս խնդրին»,-ասաց Սվիտալսկին: