Արդյո՞ք վարչապետն իր ղեկավարած կառույցի նման աշխատանքը նորմալ է համարում
Ուզում էի ՀՀ վարչապետին հարցնեի, թե արդյո՞ք լավ է, որ իր ղեկավարած կառավարության անդամ առողջապահության նախարարն օրենքի նախագիծ է առաջարկում, որը երևի քննարկվել է նաև փոխնախարարների և բաժնի պետերի մակարդակում, բայց երկրում մի քանի տասնյակ «շարքային» քաղաքացիներ իրենց փորձով և գիտելիքներով ցույց տվեցին, որ օրենքի նախագիծը խիստ թերի է և չի կարող ընդունվել այդ ձևով, ինչը և փաստվեց դրա կիրառումը հետաձգելու տեսքով;
Արդյո՞ք ինքը նորմալ է համարում, որ բացի առողջապահության նախարարից, ով առանց հետևանքները հաշվի առնելու օրենքի նախագիծ է առաջարկում, մեկ այլ նախարար առաջարկում է արգելել աջ ղեկով մեքենաների ներմուծումն ու հետագայում՝ շահագործումը, բայց այդ ամենն անում է առանց որևէ օբյեկտիվ հիմքի՝ առանց վիճակագրության, առանց փորձաքննության, միայն իր սուբյեկտիվ ենթադրությունների հիման վրա, իսկ հանդիպելով հանրության դիմադրությունը՝ կրկին հետաձգվում է օրենքի կիրառման ժամանակացույցը;
Արդյո՞ք նորմալ է, որ մեկ այլ նախարար՝ այս անգամ կրթության և գիտության՝ նույն պաշտոնից մի քանի անգամ հեռացված անձը, բացարձակ չի տիրապետում միջնակարգ կրթության ոլորտի այլանդակ վիճակին, իսկ բարձրագույն կրթության ոլորտում այնպիսի փոփոխություններ է նախաձեռնում (լուծարք չպետք է լինի, ուսանողն ինքը պետք է ընտրի, թե որ առարկան սովորի, որը՝ չսովորի, և այլն), որ դասախոսների շրջանում կարծիք է հնչում, թե կրթության նախարարն ուղղակի աշխատում է երկրի թշնամիների համար...
Ուզում էի հարցնել, թե արդյո՞ք ՀՀ վարչապետն իր ղեկավարած կառույցի նման աշխատանքը նորմալ է համարում:
Բայց չեմ հարցնում: Անիմաստ է:
Մովսես Դեմիրճյան. Ֆեյսբուք