Նախագահականի՝ «երբ ինչ պետք է» գրող «ֆեյքն» ու Դիանա Գրիգորյանի պարգևատրումն արդարացնելու փորձերը

Գաղտնիք չէ, որ հայաստանյան իշխանությունները սոցիալական ցանցերում ունեն իրենց գործիք «ֆեյք» էջերը, որոնց միջոցով հայ օգտատերերին են հասցնում իրենց պետքական տեղեկությունն ու գաղափարը:

Ինչպես արդեն հայտնել ենք, այսօր նախագահ Սերժ Սարգսյանը կանանց տոնի կապակցությամբ պարգևատրել է արդյունավետ և բարեխիղճ աշխատանքով աչքի ընկած մի խումբ կանանց: Նրանց թվում է սցենարիստ Դիանա Գրիգորյանը, ով պարգևատրվել է Մովսես Խորենացու մեդալով: Ֆեյսբուքյան բազում օգտատերեր իրենց գրառումներով քննադատում են այս պարգևատրումը, մինչդեռ նախագահականի կեղծ էջը փորձում է արդարացնել այն: Նախկինում կեղծ էջը ևս իր գրառումներում նշում էր, որ Դիանա Գրիգորյանի սցենարներն անհաջող են ու չստացված, սակայն այժմ անհարմար վիճակի մեջ է հայտնվել, քննադատում է ֆեյսբուքյան օգտատերերին ու փորձում է պաշտպանել սցենարիստին՝ գրելով, որ Դիանան արժանի է այս մրցանակին, քանի որ նրա շնորհիվ բազմաթիվ վարկանիշային սերիալներ և հաղորդումներ են նկարահանվել: Սակայն բոլորս էլ գիտենք, որ անորակ սերիալներն ամենաբարձր վարկանիշն ունեն հայկական հեռուստաեթերում, և վարկանիշն արդարացում չէ:

Կեղծ էջն արդարացնում է վատորակ սցենարները՝ պատասխանատվությունը բարդելով հասարակության պահանջարկի վրա, ինչպես ընդունված է անել բոլոր անորակ, սակայն վարկանիշ ունեցող նախագծերն արդարացնելու փորձեր անելիս: Սա ներկայացվում է հետևյալ կերպ. «պահանջարկը դեպի լավը գնա, որպեսզի սցենարիստն ինքնաբերաբար ավելի լավ գրի»: Իհարկե, նախագահականի կեղծ էջը գումար է ստանում՝ իր գործը ֆեյսբուքյան տիրույթում անելու և «երբ ինչ պետք է» գրելու համար: