Վարչապետը Կառավարության նիստին հանձնարարականներ տվեց՝ կապված trade.gov.am միասնական էլեկտրոնային հարթակի հետ
Այսօր Կառավարության հերթական նիստին ՀՀ վարչապետ Կարեն Կարապետյանն իր հանձնարարականների շրջանակում անդրադարձավ trade.gov.am միասնական էլեկտրոնային հարթակին:
«Գործող կարգավորումների համաձայն՝ ապրանքների ներմուծման կամ արտահանման դեպքում տնտեսվարողները մինչև ապրանքի փաստացի զննման կամ փորձաքննության գործընթացը պարտավորվում են ըստ ապրանքների տեսակների մի շարք մարմինների ներկայացնել պահանջվող փաստաթղթեր, ներկայացված փաստաթղթերի ուսումնասիրությունը յուրաքանչյուր մարմին իրականացնում է առանձին վարչարարությամբ և որոշակի տևողությամբ, իսկ արձանագրված թերությունների շտկման գործընթացն ըստ մարմնի ևս տարբերվում է. ժամանակատար է և առաջացնում է դժվարություններ տնտեսվարողների համար, այդ թվում՝ գործընթացի կանխատեսելիության տեսանկյունից»,- ասաց նա:
Հաշվի առնելով դա՝ վարչապետը տնտեսական զարգացման և ներդրումների, գյուղատնտեսության, տրանսպորտի, կապի և ՏՏ, բնապահպանության և առողջապահության նախարարներին, Պետական եկամուտների կոմիտեի նախագահին, «Թվային Հայաստան» հիմնադրամի գործադիր տնօրենին հանձնարարեց և առաջարկեց առևտրաարդյունաբերական պալատի նախագահին երկամսյա ժամկետում համատեղ մշակել և Կառավարության աշխատակազմ ներկայացնել գործողությունների ծրագիր՝ ապրանքների ներմուծման և արտահանման, փաստաթղթերի նախնական հայտարարագրման և ուսումնասիրման փուլը, արտաքին տնտեսական գործունեության ընթացքում տնտեսվարողներին տրամադրվող թույլտվությունների, անհրաժեշտ ծառայությունների ընդհանուր մատուցումը մեկ միասնական էլեկտրոնային հարթակի (https:
//trade.gov.am) միջոցով իրականացնելու վերաբերյալ՝ նախատեսելով պետական մարմինների գործունեության հանրամատչելի և պարզեցված կարգով իրականացման երաշխիքներ:
«Մեկ հարթակում տնտեսվարողը ներկայացնում է նյութը, այն ինչպես է ներկայացվում՝ մաքսիմալ պարզ ասում ենք, և տնտեսվարողը յուրաքանչյուր գործողության ժամանակ հստակ գիտի՝ պետական մարմինները երբ և ինչ ձևով են իրեն պատասխանում, ընդ որում՝ էլեկտրոնային հարթակ և բոլոր մնացած առավելությունները»,- ասաց նա: