Հասկացան, որ իմ ներկայությունը բավական թանկ է արժենում և հրաժարվեցին ինձանից. Նաիրա Մովսիսյան

Նաիրա Մովսիսյանը՝ հեռուստատեսային դադարի, նոր առաջարկներ չունենալու և իր հեղինակային՝ «Առողջ ապրելակերպ» նախագծի մասին:

«Արդեն որքան ժամանակ է, ինչ զբաղվում եմ իմ «Առողջ ապրելակերպ» նախագծով, ինչպես նաև ուսումնասիրում եմ մարքեթինգի և հոգեբանության ոլորտները»,- պատմեց դերասանուհին՝ նշելով, որ ֆեյսբուքյան ուղիղ եթերները, որի ընթացքում ինքը տարբեր մասնագետների միջոցով փորձում է ներկայացնել առողջ կյանքը, ապրելակերպը, իր համար դարձել է նաև բիզնես: Ասել է դերասանուհին Life.panorama.am-ի հետ զրույցում:

««Առողջ ապրելակերպ» նախագծի հետ կապված՝ պետք է ասեմ, որ այն արդեն ունի իր մեծ թիմը: Այսօր ես միակն եմ, ով բարձրաձայն կարող է ասել, որ ֆեյսբուքի ուղիղ եթերը պարապությունից ելնելով չի գործածում, այլ հակառակը, ես և գումար եմ աշխատում, և հասարակությանը իրազեկում եմ մեր հրաշալի մասնագետների մասին»,- նշեց Նաիրա Մովսիսյանը՝ հավելելով, որ երբեք չի գովազդի այն մասնագետներին, որոնց որ հավանություն չի տալիս.
«Ինձ համար ամենակարևորն իմ անունն է, եթե ես զգում եմ, որ այս կամ այն մասնագետը վատն է, ոչ մի գումարի դիմաց ես չեմ գովազդի նրան»,- շեշտեց Նաիրան:

Անդրադառնալով իր հետևորդներին՝ դերասանուհին նկատեց, որ նրանցից շատերը հիմնականում միջին և հասուն տարիքի մարդիկ են.
«Ավելի փոքր տարիքի մարդիկ հետևում են հոգեբանությանը վերաբերող ուղիղ եթերներիս, որոնք հեռարձակվում են երկուշաբթի օրերին, ոճին վերաբերող հաղորդումներին հետևում են միջին և մեծ տարիքի մարդիկ, իսկ ատամնաբուժությանը վերաբերող հաղորդումները դիտում են մեծ տարիքի մարդիկ, դիմահարդարման մասին ուղիղ եթերներիս հետևում են ավելի երիտասարդ և միջին տարիքի կանայք և աղջիկներ»,- պատմեց Նաիրա Մովսիսյանը:

Վեջինիս խոսքով՝ ուղիղ եթերների միջոցով մարդկանց այս կամ այն ոլորտի մասին տեղեկություն հաղորդելու միտքն իր մոտ միանգամից է եղել, ինչպես նաև դրան նպաստել է Նաիրայի՝ մասնագիտությամբ մարքեթոլոգ մենեջեր լինելը:
Հարցին, թե հաշվի առնելով տվյալ նախագծի ծանրաբեռնվածությունը՝ արդյոք իր դերասանական գործունեությունը կարող է տուժել, Նաիրան պատասխանեց.

«Իմ կյանքում երբեք ոչ մի բան չի տուժում, ես ամեն ինչի համար ժամանակ գտնում եմ: Օրինակ, մարտի 20-ին խաղալու եմ «Գլամուրային չոբանները» ներկայացման մեջ, որում արդեն մի քանի ամիս է, ինչ ընդգրկված եմ»,- ասաց Նաիրա Մովսիսյանը:
Դերասանուհին պատմեց նաև, որ ներկայումս հեռուստատեսային նոր առաջարկներ չունի.

«Նոր առաջրկներ չունեմ, այդ իսկ պատճառով այդ առումով հետագա անելիքներս էլ պարզ չեն: Նույնիսկ որոշ ժամանակ առաջ նկարահանվում էի սկետչներում, բայց հետո ստեղծագործական թիմը հասկացավ, որ իմ ներկայությունը նրանց վրա բավական թանկ է արժենում: Մի քանի սկետչում նկարահանվելուց հետո, հավանաբար հասկանալով, որ իրենց բյուջեն ճեղքվածք է տալիս, նրանք հրաժարվեցին ինձանից: Այնպես որ, եթե առաջարկներ լինեն ես սիրով դրանց համար ժամանակ կհատկացնեմ»,- պատմեց դերասանուհին:
Իսկ թե իր կարծիքով՝ ինչո ՞վ է պայմանավորված առաջարկ չունենալը, Նաիրան դժվարացավ պատասխանել.
«Անկեղծ ասած՝ այդ հարցի պատասխանը ես չունեմ: Գուցե այսօր երիասարդներն ավելի մատչելի գնով են համաձայնվում նկարահանվել կամ գուցե ես եմ ծերացել»,- կատակեց դերասանուհին՝ տեղեկացնելով, որ որպես նոր աշխատանք՝ այս պահին ակումբներից մեկում ինքը հանդես է գալիս որպես հաղորդավարուհի: