Գագիկ Հարությունյանը ՍԴ աշխատակազմին ներկայացրեց ՍԴ նոր անդամ Հրայր Թովմասյանին
Սահմանադրական դատարանի նախագահ Գագիկ Հարությունյանն այսօր ՍԴ աշխատակազմին ներկայացրեց ՍԴ նոր անդամ Հրայր Թովմասյանին:
Իր խոսքում Հարությունյանը նկատեց՝ ՍԴ-ում սերնդափոխության գործընթաց է սկսել, և այս համատեքստում էլ օրերս ԱԺ-ի կողմից ՍԴ նոր անդամ է ընտրվել՝ Հրայր Թովմասյանը: Նա ուրախությամբ փաստեց, որ ՍԴ-ից ժամանակին հեռացածները կրկին ՍԴ են վերադառնում:
«Ենթադրում եմ՝ ՍԴ-ի կոլեկտիվ այնքան լավն է եղել, որ հետո վերադառնում են ՍԴ: Սա փաստում է, որ ՍԴ-ն, բացի իր գործառույթները լիարժեք իրականացնելուց, միջազգային մակարդակով շոշափելի աշխատանք կատարելուց, նաև լավ թիմ է: Այս տարիների ընթացքում ՍԴ-ն նաև կադրերի լավ դարբնոց է դարձել: Ես շուտով հրաժեշտ եմ տալու ձեզ, այս 2 օրը կդադարեցնեմ ՍԴ նախագահի լիազորությունները, որովհետև ի վիճակի չեմ լինի մի ծանր աշխատանքը մյուսի հետ լրացնել, բայց մինչև մարտի 23-ը կլինեմ ձեզ հետ»,- ասաց Հարությունյանը։
ՍԴ նախագահը շնորհավորեց Հրայր Թովմասյանին և նրան բեղմնավոր գործունեություն ցանկացավ: Նա նկատեց, որ կատարյալ որևէ բան չի լինում, և նոր սերունդն իր հետ նոր մոտեցումներ է բերում: Սակայն Հարությունյանը կարևորեց նորը հնի վրա կառուցելու գաղափարը և քայլ-քայլ առաջ գնալը: Ի վերջո, Գագիկ Հարությունյանը Հրայր Թովմասյանին հանձնեց ՍԴ անդամի հագուստը:
«Այս հագուստը միայն հագնելով չէ, հագնելը նոր պարտավորություն է իր հետ բերում»,- շարունակեց Հարությունյանը:
ՍԴ նոր անդամ Հրայր Թովմասյանն էլ շնորհակալություն հայտեց Գագիկ Հարությունյանին և հիշեց, թե ինչպես էր ինքը 22 տարի առաջ ՍԴ մուտք գործում և քննություն տալիս առաջատար մասնագետ դառնալու համար, իսկ քննություն վերցնողներից մեկը եղել է հենց ՍԴ նախագահ Գագիկ Հարությունյանը:
«Ամեն պաշտոն զբաղեցնելուց առաջ՝ նախարար, պատգամավոր և այլն, իմ սրտի աշխատանքն արգանում էր, կարծում էի՝ այսօր էլ կլինի: Սակայն այսօր, էմոցիոնալ լինելով հանդերձ, ես հանգիստ եմ. հավանաբար դա նրանից է, որ վերադառնում եմ իմ արմատներին, այստեղ ինձ հարազատ մարդիկ էին»,- նշեց Հրայր Թովմասյանը:
Գարիկ Հարությունյան էլ հավելեց, թե չի բացառում, որ ինքը՝ որպես դատական բարձագույն խորհրդի անդամ, դիմի ՍԴ՝ որոշ օրենքների հետ կապված:
«Կառավարությունն ինչպես միշտ օրենքները մշակում է ըստ կառավարության ինստիտուտների խնդիրների, ինչը որոշ դեպքերում հակադրվում է Սահմանադրությանը: ՍԴ-ն լինելու է կենտրոնաձիգ այն ուժը, որ պետք է կարողանա հարթել խնդիրները և նավը դուրս բերել ժողովրդավարական զարգացման ճանապարհ: Ժողովրդի մոտ առկա հիասթափություն ու ապատիան պետք կարողանանք հաղթահարել միասնական»,-ընդգծեց Գագիկ Հարությունյանը:
Հիշեցնենք, որ ՍԴ անդամ Կիմ Բալայանի՝ թոշակի անցնելուց հետո ՍԴ անդամի մեկ թափուր տեղ էր մնացել: Այս պաշտոնի համար առաջադրվեց ԱԺ Պետական-իրավական հարցերի մշտական հանձնաժողովի նախագահ Հրայր Թովմասյանը: ԱԺ-ն ձայների 64 կողմ, 27 դեմ հարաբերակցությամբ Հրայր Թովմասյանին ընտրել էր Սահմանադրական դատարանի անդամ: