Հայաստան համահայկական հիմնադրամը 26 տարեկան է(լուսանկարներ)

Կապելով Հայաստանը Արցախին, ամրացնելով սահմանն ու զարգացնելով փոքր ու մեծ համայնքները՝ Հայաստան համահայկական հիմնադրամը այսօր նշեց իր գործունեության 26 տարին:

Համահայկական ընտանիքի համար մարտի 3-ը տարվա գլխավոր օրն է՝ հիմնադրամի ստեղծման օրը։ Աշխարհի տարբեր անկյուններում գործող 20 տեղական մարմինների ու գործընկեր կազմակերպությունների հետ իրականացվել են հազարավոր ծրագրեր։

Իր գործունեության ընթացքում Հիմնադրամն իրագործել է ավելի քան 330 000 000 ԱՄՆ դոլար արժողությամբ ծրագրեր Հայաստանում և Արցախում: Հիմնադրամը կառուցել, վերակառուցել է ավելի քան 605 կմ ճանապարհ, 580 կմ ջրագիծ ու ջրատար, 149 կմ գազամուղ, 70 կմ էլեկտրագիծ, 359 դպրոց ու մանկապարտեզ, 24 համայնքային կենտրոն, 500 տուն ու բնակարան, 75 առողջապահական հաստատություն, 58 մշակույթի ու սպորտային կենտրոն, 100 ջերմոց, իրականացրել է 169 կրթական, մշակութային ու գիտական ծրագրեր:

Ամենախոշոր ծրագրերից է ռազմավարական նշանակություն ունեցող մայրուղու՝ Վարդենիս-Մարտակերտի կառուցումը, ճանապարհը շահագործման է հանձնվել անցած տարի: Այս ամենն անհնար կլիներ առանց մարդկանց, որոնք հավատացել են ու կատարել նվիրատվություններ. հիմնադրամն ունի ավելի քան 700 000 նվիրատու Հայաստանից, Արցախից և Սփյուռքից:

Համահայկական հիմնադրամի տեղական մարմինները և գործընկեր կազմակերպությունները ներկայումս գործում են աշխարհի 18 երկրներում. Միացյալ Նահանգներում` Լոս Անջելեսում և Նյու Յորքում, Ֆրանսիայում, Կանադայում` Տորոնտոյում և Մոնրեալում, Մեծ Բրիտանիայում, Գերմանիայում, Շվեյցարիայում, Ավստրիայում, Շվեդիայում, Լիբանանում, Ավստրալիայում, Բրազիլիայում, Արգենտինայում, Հունաստանում, Կիպրոսում, Ուրուգվայում, Ռումինիայում, Իրանում և Իտալիայում: