Ավելի քան 2.500 շարքային բրիտանացի հնարավորություն կունենա ներկա գտնվել Արքայազն Հարիի ու Մեգան Մարքլի հարսանեկան արարողությանը
Մեծ Բրիտանիայի արքայազն Հարին և նրա հարսնացուն՝ ամերիկացի դերասանուհի Մեգան Մարքլը,երկրի 2.640 բնակչի են հրավիրել իրենց հարսանիքին, որը կկայանա մայիսի 19-ին, Վինձոր ամրոցում: Այս մասին գրում է «РИА Новости»-ն՝ հղում անելով Քենսինգթոնյան պալատին:
Նշվում է, որ պսակադրությունը տեղի կունենա Սուրբ Գևորգի մատուռում: Արարողությանը ներկա կլինեն զույգի բարեկամներն ու ընկերները, Եվրոպայի թագավորական ընտանիքների անդամները, ինչպես նաև՝ պաշտոնատար անձինք:
Պսակադրությունից հետո նորապսակները հնարավորություն կտան մարդկանց տեսնել իրենց՝ կառքով անցնելով Վինձորի կենտրոնով:
Աղբյուրը մանրամասնում է, որ հարս ու փեսայի և հյուրերի ժամանմանը եկեղեցի, ինչպես նաև Վինձոր ամրոցից կառքով դուրս գալու արարողությանը հետևելու հնարավորություն կստանան 1.200 երիտասարդներ, որոնք առաջնորդական հատկանիշներ են ցուցաբերել տարբեր ոլորտներում, տարբեր բարեգործական կազմակերպությունների 200 ներկայացուցիչներ, դպրոցների 100 աշակերտներ և թագավորական պալատների ավելի քան 1000 աշխատակիցներ:
Հիշեցնենք, որ զույգը հայտարարել էր, որ արդեն ստացել է թագուհի Էլիզաբեթ 2-րդի օրհնությունն ու նշանադրվել է: